Ղրղզստանի Օշի մարզի Ուզգենսկ շրջանում (գտնվում է երկրի հարավում) տեղի իշխանությունները որոշել են տուգանել նրանց, ովքեր շատ գումար են ծախսում ամուսնության և թաղման արարողության վրա: Ինչպես հայտնում է 24.kg լրատվական գործակալությունը, այսպիսի որոշում են ընդունել տեղական քենեշի (տեղական խորհրդարան) անդամները:
Շրջանի բնակչության հետ արդեն սկսել են բացատրական աշխատանքներ տանել: Նրանց, ովքեր կհրաժարվեն ենթարկվել նոր օրենքներին, իշխանությունները սպառնացել են տուգանել 25 հազարից մինչև 50 հազար սոմ (մոտավորապես 500-1000 դոլար): Կրկնակի խախտման դեպքում մեղավորին, ըստ իշխանության ներկայացուցչի, սպառնում է հետևյալը. «Տեղական համայնքը չի մասնակցի նրա ավանդական արարողություններին, տոնակատարություններին, հարսանիքներին և թաղումներին»:
Միևնույն ժամանակ չի ճշտվում, թե որքա՞ն ծախսն են իշխանավորները համարում նպատակահարմար: Ո՞վ է հաշվելու, թե ինչքան է այս կամ այն ընտանիքը ծախսել՝ նույնպես չի մանրամասնվում: Գործակալության հայտնած տեղեկության համաձայն, ամեն տարի Ղրղզստանի քաղաքացիներն ամուսնության և թաղման արարողությունների վրա ծախսում են ավելի քան 300 մլն դոլար:
Ավելի վաղ արարողությունների նշման ճոխության վրա արգելք էր դրել նաև Տաջիկստանը: 2007 թ., երկրի նախագահ Էմոմալի Ռահմոնովի նախաձեռնությամբ, հատուկ օրենք է ընդունվել, որով սահմանվել են այնպիսի ցուցանիշներ, ինչպիսիք են հյուրերի քանակը հարսանյաց հանդեսի ժամանակ, մեքենաների թիվը, ինչպես նաև սահմանափակում է դրվել մատուցվող ճաշատեսակների վրա:
2009 թ. վերջին Տաջիկստանի նախագահը հայտարարել է, որ սահմանափակումների հաշվին երկրի բնակիչները տնտեսել են ավելի քան մեկ միլիարդ դոլար:
