Այս տարվանից սկսել է գործել կենսաթոշակային կամավոր կուտակային համակարգը, իսկ 2014 թ. կներդվի կենսաթոշակային պարտադիր կուտակային համակարգը: Այս մասին այսօր լրագրողների հետ հանդիպման ժամանակ ասաց ՀՀ աշխատանքի և սոցիալական հարցերի նախարարության կենսաթոշակային ապահովության վարչության պետ Սմբատ Սաիյանը:
Նրա խոսքով կենսաթոշակային գործող համակարգը բաշխողական կամ սերունդների համերաշխության սկզբունքով է գործում, ըստ որի ներկայիս աշխատողները վճարում են ներկայիս թոշակառուների համար: Նոր համակարգը ենթադրում է, որ յուրաքանչյուր աշխատող ինքն է իր աշխատանքի տարիների ընթացքում կուտակում իր կենսաթոշակը: Պարտադիր կուտակային համակարգը պարտադիր կլինի միայն 1974թ. հետո ծնվածների համար:
Ըստ Սաիյանի` նոր համակարգը բազմաստիճան է, ինչը ենթադրում է, որ, բացի նրանից, որ պետական բյուջեից որոշակի չափով թոշակներ կվճարվեն բոլորին, կլինի նաև երկրորդ (պարտադիր կուտակում) և երրորդ աստիճան (կամավոր կուտակում): Այսինքն` թոշակառուի թոշակը կազմված կլինի պետության կողմից վճարվող բազային թոշակից, իր աշխատանքի տարիների ընթացքում պարտադիր կուտակած գումարից և, եթե անձը նաև կամավոր կուտակումներ է կատարել, այդ կամավոր կուտակած գումարներից:
Անձը կարող է մինչև թոշակի անցնելը վերցնել իր կողմից պարտադիր կուտակած կենսաթոշակային գումարները միայն որոշակի պայմաններում (օրինակ` հիվանդության): Այն նաև ժառանգվելու է այն դեպքում, երբ կուտակողը մինչև թոշակի անցնելն է մահանում:
