Այսօր` օգոստոսի 5-ին, ճանապարհատրանսպորտային պատահար է տեղի ունեցել Լոռու մարզում, Վանաձոր-Ստեփանավան ավտոճանապարհի հինգերորդ կիլոմետրի հատվածում՝ Բազում գյուղի մոտակայքում:
Ստեփանավանի բնակիչ, 20-ամյա Վոլոդյա Իշխանյանը, վարելով սեփական օգտագործման Mercedes 600 մակնիշի, 24 ՕՏ 500 պետհամարանիշի ավտոմեքենան, Բազում գյուղի մոտակայքում, կորցնելով կառավարումը, դուրս է եկել ճանապարհի երթևեկելի մասից ու գլորվել ձորը: Մեքենայի մեջ վթարի պահին եղել է միայն վարորդը, որը ստանալով մարմնական տարբեր աստիճանի վնասվածքներ ու կոտրվածքներ, տեղափոխվել է Վանաձորի բժշկական կենտրոն:
Դեպքի վայր են ժամանել ՃՈ աշխատակիցները`Ճանապարհային ոստիկանության երկրորդ սպայական գումարտակի հինգերորդ սպայական վաշտի հրամանատարի տեղակալ Մարտիկ Բալայանի գլխավորությամբ, ինչպես նաև ԱԻՆ Լոռու մարզային փրկարար ջոկատը` ջոկատի հրամանատար Սերգեյ Ղարաքեշիշյանի գլխավորությամբ:
Շուշաննա Գրիգորյան, «Առաջին լրատվական»-ի Լոռու մարզային թղթակից