Երեկ Բաղրամյան 26-ում, այսինքն` նախագահական նստավայրում ՀՀԿ, ԲՀԿ և ՕԵԿ նախագահները ստորագրել են կոալիցիոն հայտարարություն, որով Սերժ Սարգսյանը, փաստորեն, Գագիկ Ծառուկյանին պարտադրեց նույնանալ Արթուր Բաղդասարյանի հետ և միասնաբար սատարել իրեն 2013 թվականի նախագահական ընտրություններում:
Այդպիսով, կարելի է ասել, որ հանգուցալուծվեց առաջիկա խորհրդարանական ընտրություններին ընդառաջ քաղաքական ակտիվացող պայքարի առաջին` ներիշխանական հակասությունների և ինտրիգների փուլը: Իսկ կոալիցիոն հայտարարությամբ էլ նախանշվում է նոր և, ըստ էության, բավական վտանգավոր մի փուլի մեկնարկ:
«Նոր փոփոխություններին ընդառաջ` կոալիցիոն կուսակցությունները միասնական են և նպատակ չունեն գալիք խորհրդարանական ընտրություններում իրենց քաղաքական կշիռն ավելացնել միմյանց դեմ պայքար ծավալելու և կոալիցիայի ներսում ուժերի հարաբերակցությունը փոխելու հաշվին: Կոալիցիոն գործընկերները համոզված են, որ փոփոխությունների իրականացման հետևողականությունն առավել կմեծացնի կոալիցիայի քաղաքական դերակատարությունն ու նրա հանդեպ հասարակության վստահությունը` հանգեցնելով խորհրդարանական ընտրությունների արդյունքում Հայաստանի Հանրապետության Ազգային ժողովում կոալիցիայի ներկայացվածության աճին», – ասված է ՀՀԿ, ԲՀԿ և ՕԵԿ հայտարարության մեջ:
Այդ ամենից փչում է կոալիցիոն ֆաշիզմի շունչ: Սա արդեն ոչ թե մոնոլիտ իշխանության, այլ պարզապես լիովին հասարակությանը կուլ տալու, խժռելու հայտ է, որ կոալիցիան ներկայացնում է հրապարակավ, առանց քաշվելու: Փաստորեն, երեք կուսակցությունները հրապարակավ հայտարարում են, որ պատրաստվում են վերցնել նաև խորհրդարանի այն մի քանի տեղերը, որոնք մնացել էին ընդդիմությանը` «Ժառանգությանը» և ընդդիմադիր հայտարարված Դաշնակցությանը: Այսինքն` իշխանությունը այդպիսով ներկայացնում է խորհրդարանում ոչ թե բացարձակ, այլ արդեն, ըստ էության, լիակատար մեծամասնություն վերցնելու հայտ: Իսկ թե ինչպես է իշխանությունը ինչ-որ բան վերցնում` բոլորին է հայտնի: Այլ կերպ ասած` ի դեմս կոալիցիոն հայտարարության, իշխանությունը մարտահրավեր է նետում հասարակությանը, հստակ հասկացնելով, որ առաջիկա խորհրդարանական ընտրությունները դիտարկում է ընդամենը պարզ ձևականություն:
Այժմ պատասխանի հերթը հասարակությանն է, հասարակական-քաղաքական այն բոլոր ուժերինը, ովքեր իրենց դուրս են դնում կոալիցիոն ֆաշիզմի ճամբարից և թանկ են համարում Հայաստանի ազատությունը: