Ամերիկյան The New York Times թերթի փոխանցմամբ՝ իսրայելական «Մոսսադ» արտաքին հետախուզության նախկին ղեկավար Էֆրաիմ ա-Լևին հայտարարել է, որ ստեղծված քաղաքական իրողության պայմաններում Իրանի միջուկային օբյեկտներին ռազմական հարված հասցնելը կարող է իրականացվել մոտակա 3 ամիսների ընթացքում:
Նրա խոսքերով՝ ԱՄՆ-ի ու Իսրայելի ուժային կառույցներում եղած բազմաթիվ աղբյուրները մտածում են հենց այդպես. «Եթե ես լինեի իրանցի, ապա ես ստիպված կլինեի մտահոգվել իմ գոյությամբ առաջիկա 12 շաբաթներին»:
Ամերիկյան թերթի տվյալներով՝ Իսրայելի վարչապետ Բենիամին Նեթանյահուն կարծում է, որ արդեն աշնան վերջին Իրանը կհատի «կարմիր գիծը» և կստեղծի ատոմային ռումբի առաջին օրինակները, որոնք պատրաստ կլինեն Իսրայելի դեմ գործածվելու համար: Վերլուծաբանները գտնում են, որ Իսրայելը չի ցանկանում Իրանի դեմ ռազմական գործողություններ վարել ձմռանը:
Բացի այդ, Նեթանյահուն մտավախություն ունի, որ եթե այս տարի ԱՄՆ-ում կայանալիք նախագահական ընտրություններում վերընտրվի ներկայիս նախագահ Բարաք Օբաման, ապա նա կարող է այլևս շահագրգռվածություն չցուցաբերել Իրանի դեմ ռազմական օպերացիա սկսելում:
Իսկ ահա ԱՄՆ նախագահական ընտրություններում Հանրապետական կուսակցության ներկայացուցիչ Միթ Ռոմնիի հաղթանակի դեպքում նույնպես քիչ հավանական է համարվում Իրանի դեմ ռազմական գործողությունների արագ սկսումը: Նորընտիր նախագահին ժամանակ է անհրաժեշտ՝ գործերի մասին իրազեկվելու համար, իսկ Իսրայելը չի կարող սպասել՝ վախենալով, որ Իրանը կարող է ատոմային ռումբ ստեղծել:
