Ռուս հայտնի գիտնական Գրիգորի Պերելմանը, ով հրաժարվել էր Պուանկարեյի հիպոթեզի ապացուցման համար հասանելիք 1 մլն դոլար պարգևից, համաձայնել է նկարահանվել Հոլիվուդում: Ճգնավորի կենսակերպ վարող մաթեմատիկոսը մասնակցելու է իր մասին ֆիլմի նկարահանմանը: Չի բացառվում, որ որպես ֆիլմի պրոդյուսերը հանդես գա Ջեյմս Քեմերոնը:
«Ես երեք տարի շարունակ ջանք չեմ խնայել, որպեսզի պաշտոնական համագործակցության պայմանագիր կնքեմ պարոն Պերելմանի հետ»,- Комсомольская правда-ի թղթակցին ասել է իսրայելցի կինոպրոդյուսեր Ալեքսանդր Զաբրովսկին: Վերջինս բացատրել է, որ ռուս հանճարի մասին ֆիլմի նկարահանելու առաջարկով նա դիմել է Քեմերոնին, ում հետաքրքրել է առաջարկը:
«Տիեզերքի բանաձև» պայմանական անվանումով ֆիլմի նկարահանումները, դերասանների ընտրությունը, աշխատանքային խմբի ձևավորումը տեղի են ունենալու ԱՄՆ-ում: Ֆիլմի նկարահանման գաղափարը դուր է եկել նաև Պերելմանին, հենց միայն այն պատճառով, որ Զաբրովսկին խոսք է տվել շեշտը չդնել մաթեմատիկոսին նյարդայնացնող հարցի վրա, այն է` թե ինչու է գիտնականը հրաժարվել 1 մլն դոլարից:
«Հանճարը բարդ բնավրություն ունի: Բայց նա խելագար չէ, ինչպես շատերը կարծում են: Կյանքում նա սթափ մտածող, նպատակասլաց, արկածախնդիր և հումորի զգացումով անձնավորություն է», – նշում է Զաբրովսկին: Վերջինիս խոսքերով՝ Պերելմանը հատվածաբար հայտնվելու է ֆիլմում, իսկ նրա դերակատարը լինելու է դերասան:
Ֆիլմի սյուժեի հիմքում ընկած է լինելու տիեզերքի կառավարման գաղտնիքներին տիրապետող ռուս մաթեմատիկոսի կյանքի պատմությունը: Ֆիլմի մեծ մասն էլ նվիրված է լինելու տարբեր երկրների մաթեմատիկական դպրոցների ինտրիգներին:
2010 թ. Պերելմանը հրաժարվել էր հազարմյակի բացահայտման համար Քլեյի անվան Մաթեմատիկակական ինստիտուտի` Պուանկարեյի հիպոթեզի ապացուցման համար նախատեսված 1մլն դոլլար պարգևից: Մաթեմատիկոսը բառացիորեն հետևյալն է ասել այդ առիթով. «Ես գիտեմ ինչպես կառավարել տիեզերքը: Եվ ասեք`ինչո՞ւ ես պիտի վազեմ միլիոնների հետից»:
Գ.Պարելմանը ներառված է «ներկայումս ապրող հարյուր հանճարների» ցուցակի մեջ:
