Եգիպտոսի նախագահ Հոսնի Մուբարաքը ներում է շնորհել նախքան 2011թ. հեղափոխությունը կրոնական ծայրահեղականության համար երկրի ռազմական դատարանի կողմից ազատազրկման դատապարտված 26 մարդու: Այս մասին հաղորդում է RIA Novosti-ն՝ վկայակոչելով եգիպտական ԶԼՄ-ները:
Համաներման մասին հրամանը երկրի նախագահի կողմից ստորագրվել էր դեռ հուլիսի 26-ին, բայց պաշտոնական մամուլն այն հրապարակել է միայն երեքշաբթի:
Համաներման ենթարկվածների մեջ 8 մարդ դատապարտված է եղել տարբեր ժամկետների ազատազրկման «Մուսուլման եղբայրներ» միջազգային կազմակերպություններ ստեղծելու համար, ևս 18-ը՝ ներկայացնում են առավել արմատական «Ալ-Ջիհադ» և «Ալ-Գամաա Ալ-Իսլամիա» կազմակերպությունները: Համաներման ենթարկվածների մեծ մասը դատապարտված են եղել երկարաժամկետ կամ ցմահ ազատազրկման: Ոմանց դատավճիռը կայացված է եղել հեռակա կարգով, և այժմ նրանք գտնվում են Եգիպտոսի սահմաններից դուրս:
«Ալ-Գամաա Ալ-Իսլամիա» խմբավորման ղեկավարությունը, որը Մուբարաքի տապալումից հետո օրինականացվել է, դիմել է Մուրսիինʽ պահանջելով «մինչև վերջ տանել քաղբանտարկյալներին ազատ արձակելու գործընթացը» և եգիպտական բանտերից ազատ արձակել «դեռևս ճաղերի ետևում գտնվող «Ալ-Գամաայի» բոլոր համախոհներին»: Արմատական իսլամիստական խմբավորումը պնդում է, որ եգիպտական բանտերում դեռ պահվում են իրենց 24 համախոհները, որոնք դատապարտված են երկարաժամկետ կամ ցմահ ազատազրկման:
Մուհամմադ Մուրսին մինչ նախագահ ընտրվելը մտնում էր «Մուսուլման եղբայրներ» իսլամիստական շարժման ղեկավարության մեջ: Նախագահի պաշտոնը զբաղեցնելուց հետո նա ստիպված էր հրաժարվել կազմակերպությունից:
