Բաղդադի շիական թաղամասում ականապատ երկու ավտոմեքենա է պայթեցվել, ինչի հետևանքով վերջին տվյալներով զոհվել է շուրջ 20 մարդ, կան տասնյակ վիրավորներ: Ինչպես հաղորդում է Reuters-ը, զոհերի մեծ մասը խանութների սեփականատերեր են և անցորդները, կան նաև ոստիկաններ:
«Նրանք նպատակ են ունեցել պատանդ վերցնել, որպեսզի հետագայում պահանջեն ազատ արձակել «Ա-Քաիդա»-ի ձերբակալված անդամներին»,- գործակալությանն ասել է տեղի անվտանգության մարմիններից մեկի աշխատակիցը:
Ոստիկանության հաղորդմամբ՝ առաջին ավտոմեքենան պայթել է Կարադահ հրապարակում՝ ռեստորանի մոտ՝ ոստիկանական բաժանմունքից և հսկիչ-անցակետից ոչ հեռու: Երկրորդ ավտոմեքենան պայթել է մի քանի կիլոմետր հեռու՝ ոստիկանության անձնագրային բաժնի մոտ:
Բացի այդ, երկու մահապարտ և մեկ զինյալ փորձել են հարձակվել ոստիկանական բաժանմունքի վրա, սակայն սպանվել են և չեն կարողացել որևէ վնաս հասցնել:
«Ոստիկանության մեծ թվով սպաներ հասցրել են նրանց (ահաբեկիչներին-1in.am) դիմավորել աստիճանների վրա, ուստի նրանք չեն կարողացել որևէ բան անել»,- հայտնել է աղբյուրը:
