1925թ. այս օրը Շավարշ Միսաքյանի կողմից հիմնվեց «Յառաջ» հասարակական-քաղաքական ու գրական օրաթերթը:
Լույս է տեսել 1925 թվականից մինչև 2009 թվականը Փարիզում: Ընդհատվել է 1940-1945թթ. պատերազմի տարիներին: «Յառաջ»-ը եղել է ՀՀԴ բյուրոյի, ապա` ՀՀԴ Ֆրանսիայի կազմակերպության պաշտոնաթերթը: Խմբագիրները եղել են Շավարշ Միսաքյանը, Արփի Միսաքյանը:
«Յառաջ»-ը լուսաբանում էր սփյուռքահայ, հատկապես ֆրանսահայ կյանքի իրադարձությունները («Ձայներ գավառեն», «Գաղութե գաղութ» բաժիններ), ներկայացնում հայ քաղաքական կուսակցությունների, հասարակական, մշակութային կազմակերպությունների գործունեությունը:
Տպագրում էր հայ և համաշխարհային դասական գրականության նմուշներ, անտիպ էջեր, պատմությանը, արվեստին, իրավունքին նվիրված հոդվածներ: 1976-ից հրատարակվում էր օրաթերթի «Միտք և արվեստ» միամսյա հավելվածը:
