Լիբիայի տապալված նախկին առաջնորդ Մուամար Քադաֆիի որդի Սեյֆ-ալ-Իսլամը ցանկանում է, որ իրեն դատեն Հաագայի միջազգային քրեական դատարանում, ոչ թե Լիբիայում: Այս մասին հաղորդում է ITAR-TASS-ը` հղում անելով ամբաստանյալի փաստաբաններին: Նրանք Զինտան քաղաքի բանտում հանդիպել են Իսլամին և նրա անունից հայտարարությունը ներկայացրել Միջազգային քրեական դատարան:
Սեյֆ-ալ-Իսլամ Քադաֆին փաստաբաններին հայտնել է, որ Լիբիայում իր նկատմամբ կիրականացվի ոչ թե դատավարություն, այլ սպանություն: Նրա պաշտպանները նույնպես վստահ են, որ լիբիական նոր իշխանությունները չեն կարող երաշխավորել արդար դատավարություն:
Անցած տարվա նոյեմբերին Քադաֆիի որդուն բռնել էին Զինտանից մի խումբ ապստամբների հետ փախչելու փորձի ժամանակ:
Լիբիայի իշխանությունները Սեյֆ ալ-Իսլամին մեղադրում են կոռուպցիայի և ռազմական հանցագործությունների մեջ: Մարդկության դեմ իրականացված հանցանքների մեղադրանք է ներկայացրել նաև Միջազգային քրեական դատարանը` փորձելով հասնել Իսլամի արտահանձնման, որպեսզի դատավարությունը անցկացվի Հաագայում: Լիբիայի իշխանությունները հրաժարվում են իրականացնել պահանջը` պնդելով Քադաֆիի որդուն երկրի տարածքում դատելու անհրաժեշտությունը:
