ԱՄՆ-ի նախագահի թեկնածու Միթ Ռոմնիի օգնական Ռիկ Գորկան ներողություն է խնդրել երկու լրագրողից, որոնց վիրավորել է Լեհաստան այցելության ժամանակ: Այս մասին հաղորդում է Politico պարբերականը:
Լրագրողներից մեկին մամլո քարտուղարն ասել է. «Դե գնա՛ դու», իսկ մյուսին էլ` «Համբուրի՛ր հետույքս»:
Միջադեպը տեղի է ունեցել այն բանից հետո, երբ նախագահի թեկնածուն ծաղկեպսակ է դրել անհայտ զինվորի հուշարձանին և ողջունել է Վարշավայի պատերազմի վետերաններին: Երբ Ռոմնին ուղևորվել է ավտոմեքենայի մոտ, թղթակիցները սկսել են նրան այնպիսի հարցեր տալ, որոնք վերաբերել են Իսրայել կատարած այցին:
Մամլո քարտուղարը մի քանի անգամ լրագրողներին խնդրել է հարցեր չտալ և հարգանքով վերաբերվել այն վայրին, որտեղ գտնվում են: Երբ այդ խնդրանքները տեղ չեն հասել նա կոպիտ ձևով է դիմել երկու թղթակիցների: Ավելի ուշ նա ներողություն է խնդրել ` իր պահվածքն անվանելով անհարիր:
