Հնդկաստանում էլեկտրամատակարարման լայնածավալ խափանումների պատճառով 300 հազար մարդ արգելափակված է մնացել գնացքներում, հաղորդում է The New Indian Express-ը:
Երկաթուղային 6 գոտիներ, ինչպես նաև Դելիի մետրոպոլիտենը, դադարեցրել են աշխատանքները: Ընդհանուր առմամբ, կանգնել է ավելի քան 300 գնացք: Դրանց դիզելային քարշակներով կհասցնեն մինչև մոտակա կայարան, որտեղ ուղևորներին ջուր և ուտելիք են մատակարարում: Դելիի մետրոպոլիտենը օրական տեղափոխում է միջինը 1.8 մլն մարդ:
Էլեկտրամատակարարման խափանումը քաոս է առաջացրել նաև ճանապարհներին, քանի որ լուսաֆորները չեն աշխատում:
Բացի այդ, չեն աշխատում հանքահորերի վերելակները, ուստի մի քանի հարյուր մարդ չի կարողանում վերև բարձրանալ:
Հնդկաստանի հյուսիսում էլեկտրամատակարաման խաթարումը տեղի է ունեցել հուլիսի 31-ին: Արդյունքում, առանց էլեկտրականության է մնացել շուրջ 600 մլն մարդ:
