Ադրբեջանական Salam News գործակալությանը տված հարցազրույցի ժամանակ Ադրբեջանում Ռուսաստանի դեսպան Վլադիմիր Դորոխինն անդրադարձել է Ղարաբաղյան հակամարտության կարգավորմանը.
«Ղարաբաղյան հակամարտության կարգավորման հարցում մենք երեք միջնորդներից մեկն ենք: Սակայն հենց Ռուսաստանն է մյուս միջնորդներ ԱՄՆ-ից ու Ֆրանսիայից ավելի շատ զգում և հասկանում այդ հակամարտության սրությունն ու ցավոտ կողմերը: Վերջին տարիներին տեսանելի արդյունքներ չեն գրանցվել Ղարաբաղյան հակամարտության կարգավորման հարցում:
Մյուս կողմից էլ սխալ կլինի ասել, թե ոչինչ չի արվել վերջին 20 տարվա ընթացքում: Բանակցային գործընթացն ընթանում է շատ գաղտնի շրջանակներում, և ես պետք է նշեմ, որ բանակցային այդ գործընթացի շրջանակներում շատ բան է արվել: Պետք է շարունակել աշխատանքներն այդ ուղղությամբ: Ամեն դեպքում Ղարաբաղյան հակամարտության խաղաղ կարգավորումը չունի այլընտրանք»:
