Դելիի ոստիկանությունը եկել է այն եզրակացության, որ փետրվարին Հնդկաստանի մայրաքաղաքում Իսրայելի դեսպանատան մեքենայի պայթյունը կազմակերպվել է Իսլամական հեղափոխության պահապանների կորպուսի անդամների կողմից: Այս մասին հաղորդում է The Times of India պարբերականը, որին հաջողվել է ծանոթանալ ոստիկանության հետաքննության նյութերին:
Պարզվել է, որ Իսլամական հեղափոխության պահապանների կորպուսի անդամները Իսրայելցի դիվանագետների դեմ ահաբեկչության ծրագրերը քննարկել են հնդիկ լրագրող Սայիդ Մոհամմեդ Քազմիի հետ: Դա տեղի է ունեցել 2011թ. հունվարինʽ այն բանից հետո, երբ իրանցի գիտնական-ատոմագետի վրա հարձակում իրականացվեց (ենթադրաբար Իսրայելի կողմից): Այդ մարդկանց հետ Քազմին կապ է պահպանել ավելի քան 10 տարի: Մարտին նա ձերբակալվել է:
Հետաքննության մանրամասների մասին Հնդկաստանի իշխանությունները հայտնել են Իրանին: Ոստիկանության տվյալներով՝ ահաբեկչությանը մասնակից են կորպուսի 5 անդամ:
Agence France-Presse-ը գրում է, որ արդեն մարտին Ինտերպոլը 5 կասկածյալներից 4-ի ձերբակալության հրահանգ էր տվել: Սակայն այն, որ նրանք կարող են մասնակից լինել իսրայեցի դիվանագետների դեմ ահաբեկչությանը, մինչ այս չէր հաղրոդվում:
Թերթի տվյալների համաձայն՝ Դելիի և Բանգկոնգի ահաբեկչությունները, ինչպես նաև Թբիլիսիի չհաջողված ահաբեկչությունը, կազմակերպել է Սեդագատզադե Մասուդը, որը ձերբակալվել էր փետրվարին Մալայզիայում: Բացի այդ, ահաբեկչության մեջ կասկածվում է իրանուհի Լեյլա Ռոհանին:
Հիշենենք, որ Դելիում 2012թ. փետրվարի 13-ին պայթեցվել էր Իսրայելի դիվանագիտական մեքենան, որի հետևանքով վիրավորվել էր 4 մարդ, այդ թվումʽ զինվորական կցորդը և նրա վարորդը:Նույն օրը պայթուցիկ սարք էր հայտնաբերվել Վրաստանում Իսրայելի դեսպանատան մեքենայի տակ: Իսկ փետրվարի 14-ին Բանգկոկում տեղի ունեցած պայթյունի հետևանքով վիրավորվեց 5 անցորդ: Իսրայելն այդ ահաբեկչությունների մեջ մեղադրում է Իրանին, իսկ վերջինս չի ընդունում այդ մեղադրանքները:
