Թուրքական Zaman թերթի փոխանցմամբ՝ Թուրքիայի արտգործնախարար Ահմեդ Դավութօղլուն հայտարարել է, որ Թուրքիան թույլ չի տա, որ ահաբեկչական կազմակերպությունները՝ լինի դա «Քրդստանի աշխատավորական» կուսակցությունը (PKK) կամ «Ալ Քաիդան», բույն դնեն Սիրիայի հյուսիսում՝ Թուրքիայի հետ սահմանին.
«Թուրքիան կձեռնարկի բոլոր քայլերը՝ Սիրիայի հետ իր սահմանին ահաբեկչության կանխման համար: Թուրքիան դեմ է PKK-ի կողմից Սիրիայի հյուսիսում պետության կամ մեկ այլ կազմավորման ստեղծմանը: Իրաքի հյուսիսում Քրդական ինքնավարության ղեկավար Մասուդ Բարզանիի ձեռնարկած միջոցները բավական չեն ահաբեկչության խնդրի լուծման համար:
Այս շաբաթ ես կայցելեմ Հյուսիսային Իրաքի Քրդական ինքնավարություն և կհանդիպեմ Բարզանիի հետ՝ Սիրիայի հյուսիսում ստեղծված իրավիճակից դուրս գալու ելքերը գտնելու համար»:
Հիշեցնենք, որ օրեր առաջ էլ Դավութօղլուն հայտարարել էր, թե Թուրքիան Սիրիայի հարցի կարգավորման «ամենաառանցքային» դերակատարն է:
