Սերբիայի վարչապետ ու ՆԳ գերատեսչության ղեկավար Իվիցա Դաչիչն անձամբ է վերադարձրել աշխարհի շուրջ միայնակ ճանապարհորդող ճապոնացի Ռյու Ասաջինի` հուլիսի կեսերին Բելգրադում կորցրած հեծանիվը: Այս մասին հաղորդում է սերբական կառավարության մամլո ծառայությունը:
Ասաջինը առանց փոխադրամիջոցի մնացել էր այն ժամանակ, երբ Բելգրադի խոշոր առևտրի կենտրոններից մեկի կայանտեղում հեծանիվն ամրացրել էր հակաառևանգման լարով ու հեռացել:
«Սա խայտառակություն է մեր երկրի համար: Ասաջինը հեծանիվով անցել է ողջ Աֆրիկան և Եվրոպայի 11 երկիր, բայց առանց հեծանիվ է մնացել հենց մեր մայրաքաղաքում: Սերբիայի քաղաքացիների անունից հայցում եմ Ասաջինի ներողամտությունը և բարի ճանապարհ ցանկանում նրան դեպի Տոկիո: Հոսով եմ, որ մեր երկրի հետ կապված կունենա ոչ միայն վատ, այլ նաև լավ հիշողություններ»,- հայտարարել է Դաչիչը Բելգրադում կայացած միջոցառման ժամանակ:
Ճանապարհորդը շնորհակալություն է հայտնել Սերբիայի վարչապետին` ասելով, որ չնայած այդ պատահարին, նա բարեկամաբար է տրամադրված սերբ ժողովրդի հանդեպ: Ասաջին ավելացրել է նաև, որ ինչ-որ աֆրիկական երկրում գողացել էին իր կոշիկները, իսկ Նիկարագուայում նա զրկվել էր լուսանկարչական ապարատից: Ի պատասխան` Դաչիչը նշել է, որ միայն Սերբիայում են նրան վերադարձրել գողոնը:
Ոստիկանները հայտնաբերել էին չարագործին այն բանից հետո, երբ ուսումնասիրել էին և ԶԼՄ-ներում տպագրել առևտրի տան վերահսկող տեսախցիկների արձանագրած կադրերը: Պարզվել է, որ առևանգողը մի երիտասարդ էր, որը բնակվում է Բելգրադի ծայրամասերից մեկում և նախկինում իրականացրել է 10 գողություն, ունի 2 դատվածություն:
