SV Development քոնսալթինգային ընկերության կայքի փոխանցմամբ՝ Թուրքիան իսկական բում է ապրում անշարժ գույքի շուկայի ոլորտում, ինչն աննախադեպ է նրա պատմության մեջ: Ի տարբերություն այլ երկրների՝ Թուրքիային հաջողվեց խույս տալ տնտեսական փլուզումից, և ներկայումս երկիրն անշարժ գույքի մրցունակ գներ է առաջարկում գնորդներին:
Թուրք ռիելթորները հաղորդում են, որ օտարազգի ներդրողները «հոսում» են երկիր՝ անշարժ գույք գնելու նպատակով: Ամիսներ առաջ ընդունված նոր օրենքն անշարժ գույքի գնման հնարավորություն է ընձեռում ոչ բնակիչներին: Դա ներկայիս բումի հիմնական գործոններից մեկն է: Անշարժ գույքի գնումների մեծ մասը բաժին է ընկնում Թուրքիայի խոշորագույն քաղաք Ստամբուլին:
Մեկ ամսվա ընթացքում անշարժ գույքի ոլորտում կատարված ներդրումները կազմել են 1 միլիարդ դոլար: Նախորդ տարվա համեմատ, այդ ցուցանիշն աճել է 4 անգամ:
Հիշեցնենք, որ միայն օրեր առաջ հրապարակվեց անշարժ գույքի ոլորտին առնչվող նոր օրենքում տեղ գտած տարբեր երկրների ցանկը: Ըստ դրա՝ Ադրբեջանի, Ղազախստանի, Ուզբեկստանի ու Պարսից ծոցի արաբական երկրների քաղաքացիները կարող են առանց որևէ նախապայմանի անշարժ գույք ձեռք բերել Թուրքիայում:
Նույն օրինագծով՝ Հայաստանի, Սիրիայի, Հյուսիսային Կորեայի, Կուբայի, Նիգերիայի ու Եմենի քաղաքացիներն ամբողջովին զրկվել են Թուրքիայում անշարժ գույք գնելու իրավունքից: Իսկ մի շարք երկրների քաղաքացիներին էլ որոշակի պայմաններով է թույլատրվել գնել անշարժ գույք:
Օրինակ՝ Ռուսաստանի և Ուկրաինայի քաղաքացիներին արգելվել է սեփականություն ձեռք բերել Սև ծովի ափին: Իսկ ահա Վրաստանի քաղաքացիները կարող են սեփականություն ձեռք բերել Թուրքիայի բոլոր շրջաններում՝ բացառությամբ ափամերձ և սահմանային շրջաններից:
