Շաբաթ օրը Հայաստանի վարչապետ Տիգրան Սարգսյանի հրամանով Վանիկ Ասատրյանը նշանակվել է Հայաստանի Հանրապետության Լոռու մարզպետի տեղակալ։ Ավելի վաղ այդ պաշտոնից սեփական դիմումի համաձայն ազատվել էր ԲՀԿ-ական Էդիկ Կարախանյանը:
«Բարգավաճ Հայաստան» կուսակցության փոխմարզպետներն ու փոխնախարարները դեռ նախօրեին հրաժարական ներկայացրին: Կուսակցության անդամ հանդիսացող 3 փոխնախարարների և 2 փոխմարզպետների տարածած հայտարարությունում նշված էր. «2012 թվականի մայիսի 6-ի խորհրդարանական ընտրություններից հետո «Բարգավաճ Հայաստան» կուսակցությունը քաղաքական որոշում կայացրեց չմասնակցել կոալիցիոն կառավարության ձևավորմանը: Հավատարիմ մնալով մեր կուսակցության քաղաքական որոշմանը՝ մենք հայտարարում ենք այսօր ներկայացրած մեր հրաժարականների մասին: Ընտրություններից հետո որոշ ժամանակահատված մեր պաշտոնավարումը բացառապես մեկ նպատակ էր հետապնդում՝ չվտանգել և տրամաբանական ավարտին հասցնել ընթացիկ ծրագրերը»:
Հրաժարական ներկայացրած ԲՀԿ-ական պաշտոնյաների թվում է նաև Լոռու փոխմարզպետ Էդիկ Կարախանյանը, ում թեկնածությունը ԲՀԿ-ն որոշել է առաջադրել Վանաձորի քաղաքապետի պաշտոնում: Էդիկ Կարախանյանին «Առաջին լրատվական»-ը մի քանի հարց ուղղեց:
– Ո՞րն էր ձեր և մյուս ԲՀԿ-ականների հրաժարականի իրական դրդապատճառը:
– Մենք մեր տարածած հայտարարությունից ավել-պակաս բան չունենք ասելու:
– Ի՞նչը դրդեց ձեզ Վանաձորի քաղաքապետի ընտրություններում թեկնածություն առաջադրելու որոշում կայացնել:
– Մեր կուսակցականների, մեր քաղաքական խորհրդի որոշումից հետո որոշել ենք, որ մեզանից էլ պետք է թեկնածու առաջադրենք: Դրա մեջ ոչ մի բան չեմ տեսնում: Անձնական ոչ մի բան չեմ տեսնում ոչ քաղաքապետի հանդեպ, ոչ էլ ինչ-որ մեկի: Մենք մեր ծրագրերն ունենք, մյուս ուժերը` իրենց ծրագրերը:
– Իսկ հաղթանակի մեծ հույսեր ունե՞ք:
– Երևակայի, հա, որ չունենայի, չէի առաջադրվի: Ժողովուրդը, ինձ թվում ա, որ ցանկացել ա, և էդ կարծիքները հավասարակշռելուց հետո ենք որոշել առաջադրել մեր թեկնածությունը:
– Դուք որպես փոխմարզպետ՝ դժգոհություն ունեցե՞լ եք Վանաձորի գործող քաղաքապետի աշխատանքից:
– Քաղաքապետի հետ ոչ մի անձնական խնդիր չունեմ: Բայց ասել, որ աշխատանքում ամեն ինչ լրիվ նորմալ ա եղել, այդպես չի:
– Իսկ դժգոհությունների մասին տեղյակ պահե՞լ եք մարզպետին կամ հենց Վանաձորի քաղաքապետին:
– Աշխատանքային որոշ ոլորտների հետ կապված մենք հարցերի մասին տեղյակ ենք պահել:
– Լոռու ՀՀԿ-ական մարզպետի հետ երբևիցե խնդիրներ ունեցե՞լ եք:
– Որևիցե անգամ չի եղել խնդիր: Մարզպետն իրան շատ նորմալ ա դրսևորել, մենք նորմալ աշխատել ենք միասին: Չի էլ երևացել, որ մարզպետը Հանրապետական կուսակցությունն ա ներկայացնում, իսկ ես՝ «Բարգավաճ Հայաստան» կուսակցությունը:
– Մարզպետն էլ ձեր աշխատանքի՞ց էր գոհ:
– Էդ իրան պիտի հարցնեք: Ինձ էլ շատ հետաքրքիր կլիներ՝ մարզպետը գոհ է, թե ոչ:
Լոռու մարզպետ Արթուր Նալբանդյանից հնարավոր չեղավ պարզել՝ գո՞հ է եղել Էդիկ Կարախանյանի աշխատանքից: Նա երեկվա հրաժարականի մասին տեղեկությունից հետո չցանկացավ պատասխանել մեր հարցերին՝ պատճառաբանելով, թե զբաղված է: Ավելի վաղ Արթուր Նալբանդյանը պատասխանելով Էդիկ Կարախանյանի՝ Վանաձորի քաղաքապետի ընտրություններում առաջադրվելու վերաբերյալ մեր հարցին, ասել էր. «Մենք բոլոր քաղաքական ուժերին նորմալ աչքով ենք նայում: Ես այստեղ պայքար չեմ տեսնում, ընտրություններ են, յուրաքանչյուրն իր թեկնածուն ունի: Բոլորի համար ստեղծված են հավասար պայմաններ, ժողովուրդն է որոշում կայացնում նման դեպքերում»:
Խորհրդարանական ընտրություններում ԲՀԿ թեկնածուների հավաքած ձայները չեն վախեցնում Լոռու ՀՀԿ-ական մարզպետին: «Մեր մարզում ես նման դեպք չեմ արձանագրել, որ ԲՀԿ թեկնածուն հաղթի: Հիմա իմ վստահությունը շատ քիչ է, ժողովուրդն է կատարում իր ընտրությունը, ժողովուրդը կորոշի, թե ում է իր ձայնը տալիս»,- ասաց նա: