Այսօր վարչապետ Տիգրան Սարգսյանը այցելել է «Արփիմենդ» դեղագործական ընկերություն, ու, ի թիվս որոշ զավեշտալի մտքերի, հայտարարել, որ դեղագործությունը գտնվում է կառավարության ուշադրության կենտրոնում: Սա նշանակում է, որ հայ սպառողները պետք է այսուհետ խուսափեն տեղական արտադրության դեղորայք օգտագործելուց, քանի որ այն, ինչ գտնվում է մեր փառապանծ կառավարության ուշադրության կենտրոնում, չի կարող վնասակար չլինել սովորական քաղաքացու համար: Փորձը ցույց է տալիս, որ հենց կառավարությունն իր ուշադրությունն է սևեռում որևէ ոլորտի վրա, կարճ ժամանակ անց այդ ոլորտը շարքից դուրս է գալիս:
Վարչապետը նշել է, որ առողջապահության նախարարությունը ձեռնարկելու է միջոցառումներ, որպեսզի այդ դեղերն ունենան մեծ պահանջարկ Հայաստանի Հանրապետությունում: Թե ինչպես է առողջապահության նախարարությունը դա պատկերացնում, դժվար է ասել: Բայց, հավանաբար, կիրականացվեն լայնամասշտաբ միջոցառումներ` քաղաքացիների շրջանում հիվանդացության մակարդակը շեշտակիորեն բարձրացնելու ուղղությամբ, որպեսզի դեղերի սպառման ծավալներն ավելանան:
Համարյա նույն մտքերն է արտահայտել այսօր նաև առողջապահության նախարար Հարություն Քուշքյանը` խոստանալով նախաձեռնել նոր միջոցառումների շարք` ժամկետանց ու կեղծ դեղերի վաճառքը կասեցնելու նպատակով: Նախարարի խոսքերով, հայկական արտադրության դեղորայքը ծածկում է սպառողական շուկայի 40 տոկոսն ընդամենը, իսկ մնացած 60 տոկոսը հետևաբար արտասահմանյան արտադրության դեղորայք է:
Վարչապետն անդրադարձել է նաև հայկական արտադրության դեղորայքի որակին` այն համարելով ավելի բարձրորակ: Մնում է միայն պարզել, թե ինչո՞ւ են այդ դեպքում մեր բժիշկները խուսափում հիվանդին հայկական արտադրության դեղորայք նշանակելուց ու նախընտրում են արտասահմանյանը: Հավանաբար, մեր բժիշկներն ազգի դավաճաններ են, որոնք չեն ցանկանում խթանել տեղական արտադրողի գործունեությունը:
Իսկ եթե լուրջ մոտենանք հարցին, ապա դժվար է հավատալ, որ տեղական արտադրության դեղորայքը կարող է ավելի որակյալ լինել, քան, ասենք, բազմամյա ուղի անցած ու նորագույն տեխնոլոգիաներով հագեցած գերմանական կամ ֆրանսիական դեղորայքը: Եվ սա այն դեպքում, որ Եվրոպայում դեղորայքի որակի խիստ ստանդարտներ են կիրառվում, ու ոլորտը գտնվում է պետության աչալուրջ հսկողության ներքո: Օրինական պետության:
P.S.- Վարչապետի այցը դեղագործական ընկերություն, ուստի, կարելի է դիտարկել որպես սովորական գովազդ: Մնում է միայն պարզել, թե ու՞մ է պատկանում «Արփիմեդ» դեղագործական ընկերությունը: