Օրերս Վանաձորի մթերային խանութներում Տնտեսական մրցակցության պաշտպանության պետական հանձնաժողովի իրականացրած ստուգումների արդյունքում հայտնաբերվել էր, որ խանութներում վաճառվող «Դիետ» ապրանքանիշի կաթնամթերքի վրա նշված չէ արտադրման ժամանակը: Ըստ ՏՄՊՊՀ աշխատակիցների, այդ փաստը հնարավորություն չի տալիս որոշել մթերքի թարմության աստիճանը:
Այս ամենի հետ կապված, Վանաձորում խոսակցություններ են պտտվում այն մասին, որ նշված ընկերությունն առհասարակ կզրկվի լիցենզիայից և արտադրությունից դուրս կբերվի ու կարգելվի «Դիետ» կաթնամթերքի իրացումն ու վաճառքը:
Փաստի շուրջ փորձեցինք պարզաբանումներ ստանալ հենց գործարանի տնօրինությունից, որտեղից էլ, «Առաջին լրատվական»-ի թղթակցի հարցին ի պատասխան, գործարանի համասեփականատեր Արտավազդ Ալավերդյանը պատասխանեց, որ դա ընդամենը «իրենց վատը ցանկացողների» տարածած լուրերն են, ու իրենք իրենց լիցենզիայից զրկելու մասին պաշտոնական գրություն չեն ստացել:
Նշենք, որ «Դիետ»-ը սահմանափակ պատասխանատվությամբ ընկերություն է, պատկանում է Ալավերդյան ընտանիքին, ովքեր արդեն շուրջ 10 տարի Վանաձորում արտադրում ու իրացնում են «Դիետ» ապրանքանիշի կաթնամթերք:
Ընկերության համասեփականատեր Արտավազդ Ալավերդյանը, «Առաջին լրատվական»-ի թղթակցի հարցերին ի պատասխան, պարզաբանեց. «Մեր ընկերությունն ընտանեկան փոքր բիզնես է, մեծ ծավալներով արտադրություն չունենք, սահմանափակվում ենք Վանաձորի տարածքով, իսկ արտադրման ու պիտանելիության ժամկետները փաթեթին տպող սարքը ահագին թանկ արժե, մի անգամ պատվիրել էին Չինաստանից, բայց տեղ հասնելուց հետո պարզեցինք, որ մեր արտադրանքին համապատասխան չէր, ու էդ սարքը չօգտագործվեց: Փորձեցինք փոխարինել կպչուն պիտակներով, բայց էս դեպքում էլ մտածում են` ժամկետանց ապրանքից հին թուղթը հանում, նորն ենք կպցնում: Էստեղ հարցն այն է, որ էդ պիտակների վրա պիտանելիության ժամկետը կա, բայց արտադրման ամսաթիվ չկա, ստուգումների արդյունքում էլ հենց սա է խախտում գրանցվել»:
Այս պարզաբանումից հետո տրված հարցին, թե հնարավոր չէ՞ նույն այդ կպչուն պիտակների վրա նշել նաև արտադրման ամսաթիվը, ընկերության համասեփականատերը նշեց, որ իրականում խախտումը ոչ թե իրենց, այլ կաթնամթերքի պիտակավորմամբ զբաղվող իրենց աշխատակցի մեղքով է եղել. «Թթվասերը արկղում մի քանի շարքով է դասավորվում, էդ մարդն իր գործը շուտ ավարտելու համար պիտակել է միայն վերևի շարքի կաթնամթերքը, ներքևի 2 չերևացող շարքերն առանց պիտակի թողնելով, ու էդպես էլ առաքվել են խանութներ: Ստուգումների արդյունքում էլ հենց առանց ժամկետների կաթնամթերքն է հայտնաբերվել»:
Հավելենք, որ ՏՄՊՊՀ-ից ընկերությունը որևէ գրություն կամ ծանուցում դեռևս չի ստացել, փոխարենը եղել է հեռախոսազրույց, որից հետո «Դիետ» ՍՊԸ տնօրինությունը նոր սարք է պատվիրել, որը, ըստ տնօրինության, տեղ կհասնի 2 ամսից:
Շուշաննա Գրիգորյան, Լոռու մարզ
Լուսանկարը` հեղինակի
