Լոռու մարզկենտրոն Վանաձորի Շառլ Ազնավուրի անվան մշակույթի պալատում կազմակերպված աշխատանքային տոնավաճառին մասնակցելու էին եկել ոչ միայն Վանաձորի, այլև հարակից բնակավայրերի գործազուրկ բնակիչները:
Աշխատանքային տոնավաճառ Վանաձորում կազմակերպվել է չորս անգամ, ու այս անգամ էլ թափուր աշխատատեղերի հայտեր էին ներկայացրել ոչ միայն նախորդ տարիներին տոնավաճառին մասնակցած կազմակերպությունները, այլև անցած տարվանից Վանաձորում գործող հաստատությունները ևս: Ընդհանուր առմամբ, տոնավաճառին մասնակցած գործատու կազմակերպությունները 23-ն էին, որոնք միասին ունեին 500-ից ավելի առկա և մոտ 285 սպասվելիք աշխատատեղեր:
Վանաձորի զբաղվածության կենտրոնի տնօրեն Արա Առաքելյանը նշեց, որ բնակչության համար սա աշխատանք գտնելու ամենահեշտ ու արդյունավետ տարբերակն է:
Աշխատանք փնտրողների մեջ կային նաև առանց բարձրագույն կրթության մարդիկ, տարիքային բոլոր խմբերին պատկանող քաղաքացիներ, մեծ մասամբ երիտասարդներ, կային անգամ թոշակառուներ, ովքեր հույս ունեին, որ գոնե այստեղ ներկայացված աշխատանքների համար տարիքային սահմանափակումներ չեն լինի:
Աշխատանք փնտրող քաղաքացիները, ծանոթանալով ներկայացված աշխատատեղերի ցանկին, լրացնում էին ռեզյումեներ, թողնում հետադարձ կապի հասցե: Աշխատանք փնտրող բնակիչներից ոմանք նշում էին, որ հավատում են, թե կգտնեն աշխատանք, քանի որ նախորդ տարիներին իրենց այս կամ այն ծանոթին հենց տոնավաճառն է տվել աշխատելու հնարավորություն:
Շուշաննա Գրիգորյան, Լոռու մարզային թղթակից
