Կոալիցիոն թարմացված հուշագրի ստորագրումը հետաձգվել է. ավելի վաղ իշխանական մեր աղբյուրները տեղեկացրել էին, որ ըստ նախնական պայմանավորվածության` այսօր պետք է հայտարարեին նախագահի ընտրություններում միասնական թեկնածուով հանդես գալու մասին:
«Առաջին լրատվականը» տեղեկացրել էր, որ ըստ Գալուստ Սահակյանի՝ այժմ կոալիցիայի ներսում ընթանում է դիրքորոշումների ճշտում:
Ըստ մեզ հասած լուրերի՝ հայտարարության ստորագրումը հետաձգվում է, քանի որ որոշակի անհամաձայնություն կա հենց ձևակերպումների հարցում: Բանն այն է, որ ՀՀԿ-ն ու ԲՀԿ-ն եկել էին համաձայնության, որ հայտարարության մեջ պետք է չնշվի Սերժ Սարգսյանի անունը, այլ միայն այն, որ կոալիցիան հանդես է գալու միասնական թեկնածուով:
Սակայն այդ փաստի դեմ ընդվզման ալիք է բարձրացրել ՕԵԿ-ը, որը դժգոհում է, թե ինչու իրենք պետք է հայտարարեն Ս.Սարգսյանին սատարելու մասին, իսկ ԲՀԿ-ն՝ ոչ. նրանք փորձում են Ս.Սարգսյանին համոզել, որ ԲՀԿ-ն այդպես է անում, որպեսզի կարողանա հարմար պահի ծլկել:
Մինչդեռ ԲՀԿ-ն էլ որպես փաստարկ բերում է Ծառուկյանի ելույթը, որ իրենք հավատարիմ են կոալիցիոն համաձայնագրի տառին և ոգուն, և կոալիցիոն կառավարության կազմում բարեխղճորեն իրականացնում են իրենց միասնական ծրագրերը:
