Այսօր լրագրողների հետ հանդիպման ժամանակ Վրաստանի վարչապետ Նիկոլոս Գիլաուրին և Հայաստանի վարչապետ Տիգրան Սարգսյանը հայտարարեցին, թե իրենք քննարկել են գնաճի դեմ պայքարի հարցը, քանի որ սա երկու կողմերին էլ հուզում է:
Հարցին, թե կոնկրետ ի՞նչ սոցիալական ծրագրեր են իրականացնում երկու երկրները, Տ.Սարգսյանը հիշատակեց 2010թ. սկզբին նպաստների բարձրացումը, նույն թվականի նոյեմբերին թոշակների բարձրացումը և այս տարի գյուղատնտեսության ոլորտում գարնանացանի համար էժան սերմնացուի տրամադրումը:
«2010թ., երբ մենք տեսանք սակագների բարձրացում, առաջին հերթին բարձրացրեցինք սոցիալական նպաստները, որ ՀՀ-ում ստանում են մոտ 105 հազար ընտանիքներ: Նոյեմբերից էլ բարձրացրեցինք թոշակները: 2011թ. մենք կիրառելու ենք սոցիալական սուբսիդիա գյուղացիական տնտեսությունների համար` նպատակ ունենալով օգնել գյուղացիների առաջին հերթին անապահով խավերին և այն համայնքներին, որոնք ունեն սոցիալական խնդիրներ, սուբսիդավորել դրանց գարնանացանը: Նպատակ ունենք էժանացել սերմնացուների գինը այդ տնտեսությունների համար»,- հայտարարեց Տ.Սարգսյանը:
Վրաստանի վարչապետ Նիկոլոս Գիլաուրին էլ նշեց, որ գյուղացիական տնտեսությունների սուբսիդավորման նմանատիպ ծրագրեր Վրաստանն էլ է իրականացնում: «Փետրվար և մարտ ամիսներին էլ տրամադրելու ենք էլեկտրաէներգիայի և ապրանքների հատուկ վաուչերներ»,- հայտարարեց Վրաստանի վարչապետը:
