Չինաստանում փրկարարները օգնել են հարավարևմտյան Գույչժուո նահանգում տեղի ունեցած ածխահանքի փլուզումից տուժածներին: Այս մասին այսօր տեղեկացնում է «Չայնա դեյլի» թերթը:
Առաջին փլուզումը Պուանում տեղի է ունեցել չորեքշաբթի երեկոյան: Այդ ժամանակ փլվածքի տակ էր մնացել 5 մարդ: Սկսվել էին փրկարարական աշխատանքներ, սակայն տեղի էր ունեցել երկրորդ փլուզումը:
Նախնական տվյալներով` փլվածքի տակ է մնացել մոտ 40 մարդ: Վերջին տվյալներով` հինգշաբթի ուշ գիշերը փրկարարներին հաջողվել է դուրս բերել 53 հանքափորի. որոնողական աշխատանքները շարունակվում են:
Չինաստանի այդ ածխահանքը համարվում է ամենավտանգավորն աշխարհում: Ամեն տարի այնտեղ հազարավոր մարդիկ են զոհվում: Վթարների մեծ մասի պատճառն այն է, որ չեն պահպանվում անվտանգության կանոնները:
