«Վենետիկի հանձնաժողովում ուրբաթ օրը եղել է քննարկում Հայաստանի մասով, Ընտրական օրենսգրքի աշխատանքների վերաբերյալ, բայց այդ քննարկումը եղել է շատ ընդհանուր, և առանձին դետալներ չեն քննարկվել»,- «Առաջին լրատվական»-ի հետ զրույցում ասաց «Իրազեկ քաղաքացիների միավորում» ՀԿ նախագահ, ԸՕ նոր նախագծի մշակման հանձնաժողովի անդամ Դանիել Իոաննիսյանը, որը նոր է վերադարձել Վենետիկի հանձնաժողովի լիագումար նիստից։
Իոաննիսյանը նշեց, որ Վենետիկի հանձնաժողովին իրենք ընդհանուր ներկայացրել են սպասվող փոփոխությունները, բայց շատ ընդհանուր, քանի որ չկա ոչ նախագիծը, ոչ էլ փոփոխությունների ընդունված հայեցակարգը։ «Նախագծի անկյունաքարային հարցերը դեռ որոշված չեն, իսկ Վենետիկի հանձնաժողովին տեխնիկական հարցեր չեն հետաքրքրում»,- ասաց մեր զրուցակիցը՝ հավելելով, որ իրենք միայն տեղեկացրել են ռեյտինգային ընտրակարգից հրաժարվելու մասին, ընտրությունները ավելի շատ քաղաքական դաշտ բերելու մասով։
Դանիել Իոաննիսյանը նշեց, որ այս օրերին բազմաթիվ առաջարկություններ են ստանում արտախորհրդարանական քաղաքական ուժերից, հասարակական սեկտորից, որոնք մշակվում են։ «Բայց ընդհանուր առմամբ կոնսենսուսային մոտեցում կա բոլոր ուժերի մոտ՝ բացի Հանրապետականից, որը չցանկացավ մասնակցել քննարկումներին և միայն հիմա է հանձնաժողովի կազմում մասնակցելու քննարկումներին։ Բայց ընդհանուր առմամբ կա կոնսենսուսային վիճակ»,- ասաց մեր զրուցակիցը։
Անդրադառնալով ԸՕ փոփոխությունների նախագիծը Վենետւիկի հանձնաժողով ուղարկելուն՝ Իոաննիսյանը նշեց, որ նախնական տարբերակը իրենք կուղարկեն հանձնաժողովին, բայց նրանց վերջնական եզրակացությունը տրամադրվելու է հոկտեմբերին, իսկ այդքան ժամանակ չկա։
«Վենետիկի հանձնաժողովն իր վերջնական կարծիքը կարող է տալ հոկտեմբեր ամսին, բայց չկա որևէ ֆորմալ պահանջ, որ Վենետիկի հանձնաժողովի կարծիքը պետք է լսել և նոր ԸՕ-ն ընդունել։ Կարևորը Վենետիկի հանձնաժողովի կարծիքը ընդունելն է։ Նախկինում նույն հանձնաժողովը բազմաթիվ ռեկամենդացիաներ է տվել, որոնք այդպես էլ տեղ չեն գտել ԸՕ-ում։ Մենք հիմա նախագիծը մշակելիս հաշվի ենք առնում հենց այդ առաջարկները»,- ասաց մեր զրուցակիցը։
Առավել մանրամասն՝ տեսանյութում:
