Ֆրանսիան, Մեծ Բրիտանիան և Գերմանիան առաջարկել են Իրանի դեմ լրացուցիչ պատժամիջոցներ մտցնել։ Նրանց առաջարկի համաձայն՝ ԵՄ–ն պետք է միջոցներ ձեռնարկի այն կառույցների դեմ, որոնք կապված են իրանական բալիստիկ հրթիռների ծրագրի մշակման հետ։
Այս ծրագիրը Արևմուտքի հետ հարաբերություններում Իրանի գլխավոր խնդիրներից մեկն է որի լուծումը չի ներառվել միջուկային ծրագրի համաձայնագրի մեջ։
ԱՄՆ նոր նախագահի Սպիտակ տուն մուտք գործելու պահից խոսվում է 2015 թվականի հուլիսի 14-ի վիենական պայմանավորվածությունների (համատեղ համապարփակ գործողությունների ծրագրի) անկատարության մասին։ Ամերիկան այս համաձայնագիրը թույլ է անվանում, և այս տեսակետն ընդունվում է Իսրայելում, քանի որ համատեղ համապարփակ գործողությունների ծրագիրը չի երաշխավորում, որ Իրանը կդադարեցնի իր ատոմային ծրագրի նախագիծը։ Չի երաշխավորում, որ այս երկիրը այլևս սպառնալիք չի ներկայացնում Մերձավոր Արևելքի և ԱՄՆ դաշնակից երկրների համար, մասնավորապես՝ Սաուդյան Արաբիայի։ Այդ պատճառով էլ ԱՄՆ–ն հայտարարում է, որ լուրջ փոփոխություններ է պետք մտցնել համաձայնագրի մեջ։ Հակառակ դեպքում ԱՄՆ–ն սպառնում է դուրս գալ համաձայնագրից. այս մասին վերջերս հաճախ է խոսում նախագահ Թրամփը։