Ռուսական մի շարք ընկերություններ հայաստանյան սնունդ արտադրող կազմակերպություններին սննդի անվտանգությունը հավաստող անորակ հավաստագրեր են տրամադրում․ մասնավորապես, ռուսական ընկերություններ կան, որոնք էժանագին սերտիֆիկատներ են վաճառում՝ նույնիսկ չայցելելով կազմակերպություն և չտեսնելով, թե տվյալ ապրանքի արտադրությունն ինչ պայմաններում է իրականացվում, իսկ հայաստանյան ընկերություններն էլ այդ էժան հավաստագրերը ձեռք են բերում, և անգամ ոչ սանիտարահիգիենիկ պայմաններում կարողանում են արտադրություն կազմակերպել ու արտահանել Ռուսաստան:
«Իրազեկ և պաշտպանված սպառող» ՀԿ նախագահ Բաբկեն Պիպոյանը վստահեցնում է, որ այս խնդիրն առկա է ոչ միայն Ռուսաստանում, այլև Հայաստանում, որի արդյունքում էլ բազմաթիվ խնդիրներ են առաջանում շուկայում։
Պիպոյանի պնդմամբ՝ այսօր 50-60 հազար դրամով այս կամ այն տնտեսվարողը կարողանում է սերտիֆիկատ ձեռք բերել և սա այն դեպքում, երբ անվտանգության ցուցանիշների փորձաքննության գինը 150․000 դրամ է, ինչն իր հերթին հուշում է, որ առանց անվտանգության ամբողջ սպեկտորը ստուգելու՝ սերտիֆիկատ է տրամադրվում։
«Եթե ՀՀ-ն իր իսկ պետական կառույցի կողմից տրամադրած սերտիֆիկատի այսպես ասած՝ «պոչին չնստի», անվտանգությունը չստուգի և չերաշխավորի, որ Հայաստանից տրված սերտիֆիկատն էականորեն տարբերվում է Ռուսաստանի պատկան կառույցի կողմից տրված սերտիֆիկատից, ապա չի կարող կասկածի տակ առնել ռուսական կողմի տրամադրած սերտիֆիկատը․ մենք պետք է ցույց տանք, որ մեզ համար սա կարևոր խնդիր է, այսինքն, մեր համապատասխան մարմինները պետք է քայլեր ձեռնարկեն և ապացուցեն, որ մոնիտորինգի միջոցով հայտնաբերել են խախտումները, լուծել են այդ խնդիրները, այդ սերտիֆիկատը տվողներին զրկել են լիազորություններից և այսքանից հետո նոր պահանջ ներկայացնեն գործընկեր պետություններին՝ նույն քայլերն իրականացնել իրենց երկրում կամ մեզ մոտ իրականացված մոնիտորինգի հիման վրա արձանագրված խախտումը հիմք ընդունելու պահանջ ներկայացնի Ռուսաստանին, որովհետև նույն տրամաբանությամբ Ռուսաստանը շատ հանգիստ կարող է ասել՝ ներողություն, էդ ո՞նց է ստացվում, որ ձեր մոտ խախտումները թողած, եկել ու մեզանից եք պահանջում ինչ-որ բան անել․ երկխոսության ընթացքում այս կամ այն կողմը կարող է շահող դուրս գալ, եթե սկսել է իր մոտ առկա խախտումների վերացումից:
Մենք ունենք սերտիֆիկատ տրամադրող 5-6 մարմին ու մենք պետք է սկսենք մեզանից, հետո նոր Ռուսաստանին պահանջ ներկայացնենք, իսկ մենք դեռ մեր խախտումները չենք սկսել շտկել, մինչդեռ սա օրակարգային հարց պետք է լինի»,- «Առաջին լրատվական»-ի հետ զրույցում շեշտեց Բաբկեն Պիպոյանը։
Մանրամասները՝ տեսանյութում։