ԿԲ-ն հայտարարություն էր տարածել, որ կանխատեսված զարգացումների ներքո և միջնաժամկետ հատվածում գնաճի նպատակի իրագործման առումով առաջիկայում անհրաժեշտ կլինի աստիճանաբար բարձրացնել վերաֆինանսավորման տոկոսադրույքը, որի արդյունքում 12-ամսյա գնաճը կանխատեսվող հորիզոնում կգտնվի տատանումների թույլատրելի միջակայքում՝ հորիզոնի վերջում կայունանալով գնաճի նպատակային 4% միջին մակարդակի շուրջ:
Մի շարք տնտեսագետներ վերաֆինանսավորման տոկոսադրույքի բարձրացումը նաև ռիսկային են համարում, նշելով, որ մի գործիքակազմի կիրառմամբ հավասարակշռել գնաճը, գուցե չստացվի, ավելին՝ լրացուցիչ բարդություններ առաջանան։
ՀՏՊՀ «Ինովացիոն և ինստիտուցիոնալ հետազոտությունների կենտրոն»-ի ղեկավար, տնտեսագիտության թեկնածու, դոցենտ Ատոմ Մարգարյանը «Առաջին լրատվական»-ի հետ զրույցում նշեց, որ վերջին տարիներին վերաֆինանսավորման տոկոսադրույքը կայունացել էր 6 տոկոսի սահմաններում, և դրամավարկային գործիքներով խթանելու քաղաքականությունը որոշակի ֆիքսված իրավիճակում էր։ Տնտեսագետի խոսքերով՝ գուցե ԿԲ-ում վախեցած են, մտահոգություն կա լուրջ հնարավոր ճնշումների հետ կապված։
«Վերանայումը կարող է էլ ավելի խնդիրներ ստեղծել ֆինանսական ռեսուրսների հասանելիության կառավարման մասով, եթե ԿԲ-ն բարձրացնում է տոկոսադրույքը, բնականաբար, վարկային տոկոսադրույքները մասնավոր և սպառողական սեկտորի կբարձրանա։ ԿԲ-ի գործիքակազմը սահմանափակ է, միայն էլեմենտար գործիքներով կարգավորել և կառավարելի պահել գնաճը, բարդ է»,- շեշտեց նա։
Մանրամասները՝ տեսանյութում։