Շիրակի մարզի ընդհանուր իրավասության դատարանում Վարդան Գրիգորյանի նախագահությամբ ավարտվել է Սաթենիկ Գ.-ի գործի դատական քննությունը:
42-ամյա Սաթենիկին մեղադրանք էր առաջադրված պոռնկությանը նպաստելու համար՝ ՀՀ քրեական օրենսգրքի 262 հոդվածի 2-րդ մասի 5-րդ կետով:
Ըստ մեղադրանքի՝ 2015 թվականի հոկտեմբերից մինչև 2016 թվականի դեկտեմբեր Սաթենիկ Գ.-ն աշխատել է Գյումրիի Մարգարետ Թետչերի փողոցում գործող՝ «Նիկոլայ Ձվակերյան» ԱՁ-ին պատկանող հյուրանոցային համալիրում՝ որպես ադմինիստրատոր:
Նա գույքային օգուտ ստանալու և հյուրանոցի «բնականոն գործունեությունն ապահովելու նպատակով» պայմանավորվածություն է ձեռք բերել մարմնավաճառուհիներ Իզաբելայի, Լիանայի, Մարիամի, Մարինեի, Զարինայի հետ՝ հյուրանոցի այցելուների հետ վճարի դիմաց սեռական հարաբերություններ ունենալու վերաբերյալ:
Սաթենիկ Գ.-ն, ըստ մեղադրանքի, պարբերաբար զանգահարել է մարմնավաճառուհիներին, հրավիրել է հյուրանոց, որտեղ վերջիններս 5-10 հազար դրամով սեռական հարաբերություն են ունեցել հաճախորդների հետ, իսկ որպես միջնորդավճար՝ ադմինիստրատոր Սաթենիկին վճարել են 1000-3000 դրամ:
Սաթենիկ Գ.-ն իրեն մեղավոր է ճանաչել: Զղջացել է: Նրա միջնորդությամբ գործը քննվել է արագացված կարգով:
Դատարանը հիմնավորված է համարել, որ Գյումրիի «Փոլադնոց» կոչվող հյուրանոցային համալիրի ադմինիստրատոր Սաթենիկ Գ.-ն նպաստել է մարմնավաճառների կողմից նշված հյուրանոցում պոռնկությամբ զբաղվելուն:
Մարմնավաճառուհիներից մեկը նախաքննության ժամանակ առերես պնդել է իր ցուցմունքը՝ Սաթենիկի կողմից իրեն պարբերաբար հյուրանոց հրավիրելու, հաճախորդների հետ իր կողմից սեռական հարաբերությւոններ ունենալու, հյուրանոցի ադմինիստրատորին իր աշխատած գումարից միջնորդավճար վճարելու վերաբերյալ:
Մյուս մարմնավաճառուհիների հետ առերես հարցաքննությունից Սաթենիկ Գ.-ն հրաժարվել է:
Նրա ու մարմնավաճառուհիների հեռախոսների վերծանումները՝ բազմաթիվ փոխադարձ հեռախոսազանգերով, ևս հաստատել են առաջադրված մեղադրանքը:
Դեպքի վայրի զննության արձանագրությունից երևում է, որ «Փոլադնոցը» հյուրանոցային համալիր անվանելը ուղղակի ճոխություն է: Այն իրենից ներկայացրել է երկու վագոն-տնակներից բաղկացած կացարան…
Ըստ դեպքի վայրի զննության արձանագրության՝ հիշյալ «հյուրանոցում» առկա են եղել ննջասենյակներ՝ կահավորված մահճակալներով, սեղան-աթոռներով, պահարաններով: Սանհանգույցը նշված վայրում եղել է… ընդհանուր… Ադմինիստրատորի աշխատասենյակը գտնվել է մուտքից երկու մետր հեռավորության վրա՝ «հյուրանոցի» միջանցքի ձախ կողմում: Ադմինիստրատորը իրականացրել է «ընդհանուր հսկողություն»…
Դատարանը հաշվի է առել, որ Սաթենիկ Գ.-ն նախկինում դատված չի եղել, վատառողջ է, իրեն մեղավոր է ճանաչել, զղջացել է:
Դատարանում Սաթենիկը հայտնել է, թե աշխատանքի բնույթը փոխել է, աշխատում է որպես հավաքարար՝ Գյումրիի մասնավոր համալսարաններից մեկում:
Դատարանը Սաթենիկ Գ.-ին մեղավոր է ճանաչել ՀՀ քրեական օրենսգրքի 262 հոդվածի 2-րդ մասի 5-րդ կետով, դատապարտել է 3 տարի ազատազրկման՝ 1 տարով զրկելով հյուրանոցային հաստատություններում աշխատելու իրավունքից: Ազատազրկման ձևով պատիժը Սաթենիկի նկատմամբ պայմանականորեն չի կիրառվի՝ դատարանը սահմանել է 1 տարի փորձաշրջան:
