ԱՄՆ-ը չի ձգտում Իրանում հեղափոխության, սակայն այդ երկրում փոփոխությունների հույս ունի, հայտարարել է Պետդեպի պաշտոնական ներկայացուցիչ Հիզեր Նաուերթը։
«(Հեղափոխությունը) դա այն չէ, ինչին մենք ձգտում ենք, մենք ցանկանում ենք փոփոխություններ, մենք ցանկանում ենք, որպեսզի Իրանի իշխանությունները սկսեն լսել իրենց ժողովրդին, դա դեռևս տեղի չի ունենում»,-ասել է Պետդեպի ներկայացուցիչը Fox News-ի եթերում՝ պատասխանելով հարցին այն մասին, թե ցանկանու՞մ է արդյոք Վաշինգտոնը իշխանափոխություն Իրանում։
Իրանի խոշոր քաղաքներում, ինչպիսիք են Թեհրանը, Մեշհեդը, Սպահանը և Ռեշտը, դեկտեմբերի 28-ից բողոքի զանգվածային ակցիաներ են անցկացվում։ Երկրի նախագահ Հասան Ռուհանին հայտարարել է, որ ցույցերի պատճառը ներքին խնդիրներն են, ինչպես նաև այլ պետությունների հրահրումները։
