Սենատոր Բերնի Սանդերսն ԱՄՆ նախագահ Դոնալդ Թրամփին կոչ է արել հրաժարական տալ սեքսուալ ոտնձգությունների մեղադրանքների պատճառով, որոնք ԱՄՆ նախագահին առաջադրել են մի քանի կանայք: Այս մասին հայտնում է CNN հեռուստաալիքը:
«Այո, ես կարծում եմ՝ նա պետք է հրաժարական տա»,- CNN-ի եթերում ասել է անկախ սենատոր Սանդերսը:
«Դուք ունեք նախագահ, որին շատ-շատ կանայք մեղադրել են առնվազն ոտնձգությունների մեջ,- ասել է Սանդերսը:- Սա այն նույն երիտասարդն է, ով տեսանյութում է, ում տեսել են բոլորն ԱՄՆ-ում, ըստ էության, պարծենում էր կանանց վրա իր սեքսուալ հարձակումներով»:
Սանդերսը հավելել է, որ ինքը չի հավատում, որ Թրամփն իսկապես ինքնակամ կհեռանա նախագահի պաշտոնից:
Ավելի վաղ Ամերիկացի 4 սենատորներ կոչ են արել նախագահ Թրամփին հրաժարական տալ՝ կապված սեռական ոտնձգություններին առնչվող մեղադրանքների հետ։ «Նախագահ Թրամփը պետք է հրաժարական տա»,-հայտարարել է սենատոր Քիրսթեն Ջիլիբրանդը CNN-ի հետ հարցազրույցում։ «Այդ մեղադրանքներն արժանահավատ են ու բազմաթիվ»,-ասել է նա։
Դեկտեմբերի 12-ին Թրամփն իր թվիթերյան էջում պատասխանել է իր հասցեին հնչեցված սեռական ոտնձգությունների վերաբերյալ մեղադրանքներին. «Չնայած զուր ծախսված ժամանակին և միլիոնավոր դոլարներին, դեմոկրատներին չհաջողվեց ապացուցել «Ռուսաստանի հետ դավադրությունը»։ Այդ իսկ պատճառով նրանք հիմա որոշել են դիմել կեղծ մեղադրանքների և կանանց մասին հորինված պատմությունների, որոնց ես չեմ ճանաչում և երբեք չեմ հանդիպել»։