Հայաստանը և Ճապոնիան Եվրամիության միջոցով կկարողանան ավելի սերտ համագործակցության ուղիներ փնտրել: Լրագրողների հետ զրույցում այս մասին ասաց Հայաստանում Ճապոնիայի դեսպան Էյջի Տագուչին:
«Միգուցե, ոչ բոլորը գիտեն, որ նախորդ շաբաթ Ճապոնիան նույնպես ԵՄ հետ ստորագրեց համաձայնագիր, որը կոչվում է տնտեսական համագործակցության համաձայնագիր: Դա էլ ևս մեկ նմանություն է երկու երկրների միջև (Հայաստանի և Ճապոնիայի- հեղ.): Ես գիտեմ, որ Հայաստանը Եվրասիական տնտեսական միության անդամ է, և ուզում եմ ասել, որ Ռուսաստանը Ճապոնիայի համար կարևոր տնտեսական գործընկեր է, մենք ունենք լավ տնտեսական հարաբերություններ: Հայաստանն իսկապես եզակի դիրք ունի, քանի որ լինելով ԵԱՏՄ անդամ, նաև համաձայնագիր է ստորագրել Եվրամիության հետ: Եվ դա ճապոնական ընկերությունների համար որոշակի առավելություն է»,-ասաց նա:
Դեսպանը հատկանշական համարեց նաև այն, որ Հայաստանում հատկապես երիտասարդ սերունդը լավ տիրապետում է և ռուսերենին, և անգլերենին, ինչը օտարերկրացի ներդրողի համար ևս շատ կարևոր է:
«Սա մեծ առավելություն է՝ ներդրողների կամ այն կազմակերպություննների համար, ովքեր ցանկանում են արտադրություն կամ դուստր կազմակերպություն հիմնել Հայաստանում»,-ասաց Էյջի Տագուչին: