«Պրոֆեսիոնալ սպորտն առանց այն էլ առողջության համար շատ վնասակար ոլորտ է և առանձին վնաս հասցնել սպորտսմեններին նաև դեղամիջոցների միջոցով, որովհետև դոպինգն ի վերջո նաև դեղամիջոց է, դա նշանակում է հակամարդկային դրսևորում՝ մարդուն օգտագործել միայն հանուն նրա, որպեսզի քո երկրի համբավը բարձրանա։ Մենք գիտենք, որ իրականում ոչ միայն Ռուսաստանը, այլև շատ ուրիշ երկրներ Օլիմպիական խաղերում իրենց երկրի հաղթանակը ընկալում են որպես քաղաքական հաղթանակ, բայց իրականում այդպես չպետք է լինի․ պետք է տարանջատել սպորտը քաղաքականությունից»,- «Առաջին լրատվական»-ի հետ զրույցում նման կարծիք հայտնեց Երևանի պետական տիկնիկային թատրոնի գեղարվեստական ղեկավար և տնօրեն Ռուբեն Բաբայանը։
Հիշեցնենք, որ Ռուսաստանի հավաքականը հեռացվել է Հարավային Կորեայում անցկացվելիք 2018-ի ձմեռային օլիմպիադայից: Նման աննախադեպ որոշում կայացրել է Միջազգային օլիմպիական կոմիտեի գործադիր կոմիտեն` երեկ երեկոյան Լոզանում անցկացված դռնփակ նիստում, որտեղ լսվել են միանգամից երկու համապարփակ զեկույցներ` ռուսական դոպինգային սկանդալի վերաբերյալ: Սա օլիմպիական պատմության մեջ առաջին դեպքն է, երբ մի ամբողջ երկիր հեռացվում է խաղերից:
Հարցին՝ արդյո՞ք Հայաստանի իշխանությունները, սպորտի պատասխանատուները չպետք է հետևություններ անեն այս ամենից և արդյո՞ք չկա վտանգ, որ Ռուսաստանի «օգնությամբ» հայաստանյան մարզիկները ևս կարող են հայտնվել նման միջազգային սկանդալների կիզակետում, Ռուբեն Բաբայանը պատասխանեց․ «Հնարավոր է․ որևէ բան բացառել չի կարելի, բայց հույս ունեմ, որ մենք, բոլոր դեպքերում, գոնե ձգտում ենք ուրիշ արժեքային համակարգով ապրել, մարդու կյանքը, մարդու առողջությունը մեզ համար պետք է լինի առաջնային։ Եթե նման բան մեզ մոտ էլ բացահայտվի, ապա ես կլինեմ առաջիններից մեկը, որը կդատապարտի դա, բայց հուսով եմ, որ այս պատմությունը լավ օրինակ կծառայի շատ շատերին․ կան բազմաթիվ մարդիկ, պաշտոնյաներ, որոնց համար Ռուսաստանի համակարգն իդեալական է որպես այդպիսին և որոնք փորձում են ամեն ինչով կրկնել դա մեր երկրի մասշտաբներով կամ նմանվել այդ համակարգին։ Կարծում եմ, որ սա ուղղված է նաև նրանց, որ չպետք է ամեն ինչ կրկնօրինակել և պետք է առաջնորդվել ուրիշ արժեքային չափանիշներով․ չի կարելի կեղտոտ ձեռքերով մտնել սպորտ»։
Մանրամասները՝ տեսանյութում։