Վրաստանի ոստիկանությունը տաք հետքերով ձերբակալել է Իմերեթի տարածաշրջանի 2 բնակչի նկատմամբ կատարված ավազակային հարձակման 2 մասնակցի։ Այս մասին հայտնում է «Գրուզիա Օնլայնը»։
Ինչպես հայտնում է Վրաստանի ՆԳՆ-ը, ձերբակալվածներն Ադրբեջանի քաղաքացիներ են՝ ծնված 1988 և 1973 թթ.։ Նախնական տեղեկություններով՝ ձերբակալվածները հանդիսանում են ադրբեջանցի ազդեցիկ «օրենքով գող» Մադիր Սալիֆովի (Գուլի) հանցավոր խմբի ակտիվ անդամներ։
Զինված հարձակումը տեղի 2 բնակիչների վրա կատարվել է դեկտեմբերի 1-ին՝ Թբիլիսի-Բաթումի մայրուղու վրա՝ Սակասրիա գյուղում։ Ավազակները 5-ն են եղել։ Նրանց ինքնությունը պարզվել է։ Ներկայում հետախուզում է իրականացվում մնացած 3-ի նկատմամբ, ովքեր հանդիսանում են Վրաստանի քաղաքացիներ։ Նրացից 2-ը, ըստ ՆԳՆ տվյալների, «օրենքով գողեր» են։
Հարձակվելով BMW մեքենայով Բաթումի ուղևորվող ձեռնարկատերերի վրա և սպառնալով՝ չարագործները հափշտակել են 140 հազար դոլար, բջջային հեռախոսներ, անձնական իրեր և փախուստի դիմել։
Փաստի առթիվ հարուցվել է քրեական գործ։ Ձերբակալվածների մոտից խուզարկությամբ առգրավվել է գողացված գումարի մի մասը՝ 90 հազար դոլարը։
