«Ընտրություններին Շիրակի մարզից ընտրված «Ծառուկյան» խմբակցության պատգամավորները ոչ թե խառնվում են, այլ ընտրություններին մասնակցում են, աջակցում են, ինչու չէ՝ ձայները պահելու համար»,- «Առաջին լրատվական»-ի հետ զրույցում ասաց ԱԺ «Ծառուկյան» խմբակցության պատգամավոր, Տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի նախագահ Վարդևան Գրիգորյանը՝ անդրադառնալով հարցին, որ Շիրակի մարզի որոշ համայնքներում ընտրությունների հետ կապված հարցերում ակտիվություն են դրսևորում նաև Գյումրու քաղաքապետ Սամվել Բալասանյանը և «Ծառուկյան» խմբակցության պատագամավոր, Գյումրու նախկին քաղաքապետ Վարդան Ղուկասյանը:
«Եթե Ղուկասյան Վարդանը ինչ-որ ձևով մասնակցում է այդ ընտրություններին, իհարկե՝ ինքը պաշտպանելու է «Ծառուկյան» դաշինքի թեկնածուին, այդ թվում՝ նաև ես: Ոչ թե խառնվում ենք, այլ անձամբ ես 2 օր եղել եմ ոչ միայն Գյումրիում, այլև Ախուրյանի համայնքում, որոշակի հարցեր ենք քննարկել թեկնածուի, շտաբի աշխատողների հետ»,- շեշտեց նա:
Դիտարկմանը, որ երկու թեժ կետերում ընդդիմությունը դեռևս ակտիվություն չի դրսևորում, թեկնածուներ չկան առաջադրված, մասնավորապես՝ Արտաշատում և Ապարանում, Վարդևան Գրիգորյանն ասաց. «Արտաշատում բուն ինֆորմացիային չեմ տիրապետում, տիրապետում եմ այնքանով, որքանով լրատվությունն է տալիս: Ընտրություններին մասնակցելը ոչ թե օլիմպիական սիստեմով է լինելու՝ մասնակցել մասնակցելու համար, դա ինքնանպատակ չէ, այլ թեկնածուի, ռեսուրսի խնդիր է, որոշակի խնդիրներ կան»:
Մանրամասները՝ տեսանյութում: