Շենգավիթ վարչական շրջանի ընդհանուր իրավասության դատարանի ապակեպատ դահլիճում Նելլի Բաղդասարյանի նախագահությամբ դարձյալ հետաձգվեց 2016 թվականի նոյեմբերի 13-ին «Լիա» գեղեցկության սրահում տեղի ունեցած աղմկոտ սպանությունների գործով դատական նիստը:
Եթե նախորդ անգամ կալանավայրից չէին ներկայացրել քրեական աշխարհում մականուններով հայտնի ամբաստանյալներին՝ Պետրոս Իսրայելյանին՝ «Չարբախցի Գեղամ» մականունով, Ալիկ Բանդուրյանին՝ «Նորատուսցի Ալիկ» մականունով, ապա այս անգամ դատարան չէր բերվել միայն Նորատուսցի Ալիկը:
Վերջինիս շահերի պաշտպան, փաստաբան Երեմ Սարգսյանը դատարանին հայտնեց, որ իր պաշտպանյալ Ալիկ Բանդուրյանը գտնվում է քաղաքացիական հիվանդանոցում՝ «Աստղիկ» բժշկական կենտրոնում, նա նախապատրաստվում է վիրահատության: Այդուհանդերձ, հիվանդանոցից տրված տեղեկանքի հիման վրա պաշտպանական կողմը տեղյակ էր պահել պատկան մարմնին, որ Ալիկ Բանդուրյանը կարող է մասնակցել դատական նիստին, նրան պետք է դատարան հասցնել հիշյալ բժշկական կենտրոնից: Սակայն բժշկական կենտրոնից հիվանդ կալանավորի տեղափոխումը դատարան չէր կազմակերպվել անհայտ պատճառներով՝ կալանավայրից դատարանին այդ մասին ոչինչ չէին հաղորդել:
Ամբաստանյալի բացակայությամբ դատական նիստը կայանալ չէր կարող, այն հետաձգվեց:
Հարկ է կրկին անգամ բարձրացնել Շենգավիթ վարչական շրջանի ընդհանուր իրավասության դատարանի ապակեպատ դահլիճից դատական նիստեր լուսաբանելու անհնարինության հարցը, քանզի դահլիճում ոչինչ չի լսվում: Դահլիճում գտնվողները, այդ թվում՝ նիստը լուսաբանելու նպատակով այնտեղ գտնվող լրագրողները ասես համր ֆիլմի ցուցադրության են մասնակցում: Ինչ-որ բան լսելու կամ ենթադրելու համար լարված հետևում են խոսողներին, սակայն կցկտուր պատառիկներ կորզելով՝ երբեմն միանգամայն այլ բան են լսում, քան՝ իրականում խոսվում է ապակիներից անդին: Լրագրողները դատական նիստի ավարտին ստիպված են լինում վազել փաստաբանների հետևից ու խնդրել, որ կրկնեն, թե ինչ են ասել նիստի ժամանակ: Սա առնվազն զավեշտ է…
Այս չարչրկված հարցն ինքն էլ հոգնել է երևի ծեծվելուց, բայց հիշյալ դահլիճում անցկացվող նիստերի հրապարակայնությունն ապահովելու համար պատասխանատուները համառորեն մնում են նույն կեցվածքին՝ ավելին անել հնարավոր չէ, բավարարվեք եղածով…
Ներկայացվող աղմկոտ գործով ամբաստանյալի աթոռին երեք ամբաստանյալներ են: Բացի վերը հիշատակված մականունավորներից՝ ամբաստանյալի կարգավիճակ ունի նաև Արմեն Գասպարյանը, ով, ըստ մեղադրանքի, հանդիսանալով «Նորատուսցի Ալիկի» մտերիմը և մշտապես ուղեկցելով նրան, հաստատապես տեղեկացել է «Նորատուսցի Ալիկի» օժանդակությամբ ու դրդչությամբ «Չարբախցի Գեղամի», Գևորգ Ավետիսյանի և քննությամբ չպարզված այլ անձանց կողմից, խմբի կազմում դիտավորությամբ Մուշեղ Մուշեղյանի առողջությանը ծանր վնաս պատճառելու մասին, սակայն դրսևորել է հանցավոր անգործություն և նախապատրաստվող ծանր հանցագործության մասին դիտավորությամբ չի հայտնել իրավասու մարմիններին: Արմեն Գասպարյանին մեղադրանք է առաջադրվել ՀՀ քրեական օրենսգրքի 335 հոդվածի 1-ին մասով:
Մյուս երկու ամբաստանյալներին առաջադրված մեղադրանքները ծանր մեղադրանքներ են:
Պետրոս Իսրայելյանը՝ «Չարբախցի Գեղամը», մեղադրվում է խմբի կազմում դիտավորյալ սպանության համար՝ ՀՀ քրեական օրենսգրքի 104 հոդվածի 2-րդ մասի 7-րդ կետով, իսկ Ալիկ Բանդուրյանը՝ «Նորատուսցի Ալիկը», մեղադրվում է ՀՀ քրեական օրենսգրքի 38-112 հոդվածի 2-րդ մասի 6-րդ կետով՝ տուժողի առողջությանը ծանր վնաս հասցնելուն դրդելու, օժանդակելու համար, ինչի հետևանքով տուժողը մահացել է:
Ըստ մեղադրանքի՝ Նորատուսցի Ալիկը Չարբախցի Գեղամի հետ հեռախոսային խոսակցության ժամանակ «հորդորներ է հնչեցրել» Մուշեղ Մուշեղյանի վերաբերյալ. «Դրան մորթեք, սատկացրեք, մահակներով ոտքերը ջարդեք»: Այսինքն, ըստ մեղադրանքի, դրդել է Մուշեղ Մուշեղյանի առողջությանը ծանր վնաս պատճառելուն և «հորդորելու, շահագրգռելու եղանակով Պետրոս Իսրայելյանի մոտ Մուշեղ Մուշեղյանի նկատմամբ հանցավոր ոտնձգություն կատարելու վճռականություն է հարուցել»:
Ըստ մեղադրանքի՝ Ալիկ Բանդուրյանը դեպքի օրը՝ 2016 թվականի նոյեմբերի 13-ին, հանցավոր խմբին օժանդակել է՝ ծրագրված հանցագործությունը՝ Մուշեղյանի առողջությանը ծանր վնաս պատճառելու գործընթացը հեշտացնելու, այն «անխոչընդոտ» իրականացնելու եղանակով:
Պետրոս Իսրայելյանը՝ «Չարբախցի Գեղամը», ըստ մեղադրանքի, նախնական համաձայնության է եկել Գևորգ Ավետիսյանի ու քննությամբ չպարզված անձանց հետ և Ալիկ Բանդուրյանի օժանդակությամբ իրագործել է Մուշեղ Մուշեղյանի նկատմամբ ծրագրված ոտնձգությունը, սակայն հանդիպել է Մուշեղ Մուշեղյանի զինված դիմադրությանը՝ վերջինս անհրաժեշտ պաշտպանության վիճակում կրակոցներ է արձակել:
Մուշեղյանի դիմադրությունը հաղթահարելու, այդ ժամանակ ծագած՝ Մուշեղյանին սպանելու հանցավոր դիտավորությունը ավարտին հասցնելու նպատակով, ըստ մեղադրանքի, Պետրոս Իսրայելյանը խմբի կազմում Մուշեղյանին ուղղակի դիտավորությամբ սպանել է:
«Լիա» գեղեցկության սրահում կատարված «ռազբորկայի» արդյունքում 25-ամյա Գևորգ Ավետիսյանը՝ Պետրոս Իսրայելյանի բարեկամը, տեղում մահացել է:
38-ամյա Մուշեղ Մուշեղյանն ու 35-ամյա Արամ Պետրոսյանը վնասվածքներով տեղափոխվել են հիվանդանոց, որտեղ Մուշեղ Մուշեղյանը մահացել է:
