«Փաստաբանների պալատի նախագահը իրականությունից շատ է կտրվել: Նա փոխանակ նայի Պալատում ստեղծված խնդիրներին, որակյալ ու հեղինակավոր փաստաբաններին, բոլորովին հակառակն է անում»,- «Առաջին լրատվական»-ի հետ զրույցում ասաց իրավապաշտպան Ժաննա Ալեքսանյանը:
Նշենք, որ Փաստաբանների պալատի նախագահ Արա Զոհրաբյանը նախօրեին հայտարարել է, որ «Պանարմենիան Մեդիա Գրուպ»-ի հետ կապված լրատվամիջոցները թիրախավորում են Փաստաբանների պալատը: «Մենք մշտապես խնդիրներ ունեցել ենք։ Հիմա խնդիրներն ավելի սրված են։ Ես կարծում եմ, որ այստեղ Փաստաբանների պալատին թիրախավորելու խնդիր կա, և այդ միտումը գալիս է ոչ թե կոնկրետ փաստաբանից, այլ գալիս է ավելի վերևից։ Մասնավորապես, մեր մոնիթորինգի տվյալները ցույց են տալիս, որ, օրինակ, մի քանի լրատվամիջոցներ, որոնք ուղղակի կապված են կամ կապված չեն «Պանարմենիան Մեդիա Գրուպ»-ի հետ, կոնկրետ թիրախավորում են Փաստաբանների պալատը, իսկ մենք գիտենք, թե ով է «Պանարմենիան Մեդիա Գրուպ»-ի վարողը»,- ասել է Զոհրաբյանը։
«Արա Զոհրաբյանն անձամբ ինքն իրեն դրել է մի այլ հարթության մեջ և մնացածին վերևից է նայում: Ինքն իրեն անխոցելի է համարում, մինչդեռ խնդիրները ակնհայտ են: Բայց Զոհրաբյանը այդ խնդիրները լուծելու փոխարեն մեղավորներ է փնտրում: Մենք տեսնում ենք, ակնհայտ է, որ Պալատի նախագահը չի տիրապետում իրավիճակին և ճիշտ գնահատական չի կարողանում կամ չի ցանկանում տալ ստեղծված իրավիճակին: Նման իրավիճակում իզուր է մամուլին մեղադրելը պատվիրված հոդվածներ գրելու մեջ: Ժամանակին հենց իրեն էին մեղադրում փաստաբանների դեմ հոդվածներ պատվիրելու մեջ: Դա անգամ հաստատվեց»,- հիշեցրեց տիկին Ալեքսանյանը՝ հավելելով, որ լավ կլինի՝ քննադատությունը ադեկվատ ընդունվի, և դրանից հետևություններ արվեն:
Հիշեցնենք, որ անցած տարի Պալատի ներկայիս գործունեության դեմ արտահայտվող փաստաբաններից մի քանիսը հայտնվել էին Պալատի ուշադրության կենտրոնում, և Պալատի մամուլի նախկին խոսնակը լրատվամիջոցներից մեկով հոդվածներ էր պատվիրել այդ փաստաբանների դեմ: Այդ փաստը հաստատեց նաև հոդվածը հրապարակած լրագրողը՝ հրապարակավ հայտարարելով, որ այդ հոդվածները իրեն տվել է հրապարակելու Պալատի այդ ժամանակվա խոսնակ Հայկ Հարությունյանը:
Իրավապաշտպանի դիտարկմամբ՝ Արա Զոհրաբյանը եթե ցանկանում է Պալատի նախագահ մնալ և նորից ընտրվել, ոչ թե պետք է քննադատությունը սվիններով ընդունի, այլ պետք է լուծի խնդիրները, որոնք այսօր ծառացել են Պալատի առաջ, և որը թաքցնել այլևս անհնար է:
«Եթե չի կարողանում լուծել, թող չառաջադրվեր նորից Պալատի նախագահի ընտրություններում: Այն, ինչ այսօր կատարվում է Պալատում, այդ կողմնակալ մոտեցումը, այդ թշնամական վերաբերմունքը լավագույն փաստաբանների խմբի նկատմամբ, մի բանի մասին է միայն փաստում. Արա Զոհրաբյանը չի տիրապետում իրավիճակին: Նա անգամ առողջ քննադատությունն է ընկալում որպես անձնական խնդիր: Մինչդեռ ոչ Տիգրան Աթանեսյանը, ոչ Լուսինե Սահակյանը, ոչ Վարոսյանը ոչ մի անձնական խնդիր չունեն Պալատի ու նրա նախագահի հետ»,- ընդգծեց տիկին Ալեքսանյանը:
Մեր զրուցակիցը համաձայն չէ նաև Արա Զոհրաբյանի վերջին հարցազրույցում արված մեկ այլ դիտարկման հետ, թե Փաստաբանների պալատն «անկախ է ինչպես պետական մարմիններից, այնպես էլ մի խումբ փաստաբաններից»։ Իրավապաշտպանի խոսքով՝ Պալատն անկախ էր տարիներ շարունակ, բայց ոչ հիմա: «Փաստաբանների պալատը միշտ եղել է ինքնուրույն՝ մինչև Արա Զոհրաբյանը, և թույլ չի տվել, որ իշխանությունը մուտք գործի Պալատ, խառնվի փաստաբանների հարցերին, խուզարկի նրանց, հեղինակազրկի փաստաբաններին: Որևէ մեկը մինչև հիմա դա թույլ չէր տվել, իսկ հիմա տեսնում ենք՝ ինչ պատկեր է: Հետևաբար Արա Զոհրաբյանը լավ կանի մտածի Պալատի հեղինակության մասին և ոչ թե փաստաբանների խուզարկությունները անվանի զննություն կամ դատական դեպարտամենտի հետ գնա համագործակցության փաստաբանների նսեմացման հաշվին»,- նկատեց իրավապաշտպանը:
Տիկին Ալեքսանյանի համար տարօրինակ է նաև Պալատի արձագանքը, վերաբերմունքը այլընտրանքային պալատ ստեղծելու գաղափարի վերաբերյալ: Նրանք դա ընկալում են որպես գործող Պալատը պառակտելու փորձ, որը, Ալեքսանյանի խոսքով, զավեշտալի է:
«Մարդիկ պարզապես չեն ցանկանում քեզ հետ աշխատել: Եթե դու չես կարողանում կամ չես ցանկանում լուծել առկա հարցերը, ապա շատ նորմալ է, որ պետք է այլընտրանքային Պալատ ստեղծվի, որը ունակ կլինի պաշտպանել փաստաբաններին, գերադասել նրանց շահը, այլ ոչ թե իշխանության ներկայացուցչի»,- եզրափակեց Ժաննա Ալեքսանյանը:
Լուսանկարը՝ aravot.am-ի