«Բացարձակ ոչ մեկ չգիտի, թե ինչից է ծագել վիճաբանությունը, և ինչու է բանը հասել սպանության: Ուղղակի գիտենք, որ երկուսն էլ Բերդում ծնված մեծացած անձինք են: Ուրիշ մանրամասներ չգիտենք»,- «Առաջին լրատվական»-ի հետ զրույցում ասաց Բերդի համայնքապետ Հարություն Մանուչարյանը՝ անդրադառնալով երեկ գիշեր Բերդում տեղի ունեցած սպանության դեպքին:
Հիշեցնենք, որ երեկ ժամը 22:30-ի սահմաններում, Տավուշի մարզի Բերդ քաղաքի «Միջիաղբյուր» կոչվող պուրակի դիմաց ենթադրյալ հանցագործություն կատարած անձը կտրող-ծակող գործիքով հարվածել է Բերդ քաղաքի 30-ամյա բնակչի որովայնի շրջանին, որի հետևանքով ստացած վնասվածքներից վերջինս մահացել է:
Դեպքի առթիվ ՀՀ ՔԿ Տավուշի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասի հատկանիշներով:
Համայնքապետը հրաժարվեց որևէ այլ մանրամասն տեղեկություն տրամադրել կատարվածից՝ հորդորելով մանրամասները հետաքրքրվել գործով քննիչից: Վերջինս, մեզ հետ զրույցում ևս հրաժարվեց ասել, թե ինչպես է եղել դեպքը, ինչից է ծագել վիճաբանությունը՝ հղում անելով նախաքննական գաղտնիքը չհրապարակելուն:
«Առաջին լրատվական»-ին, սակայն, հաջողվեց պարզել, որ մահացածը Բերդ քաղաքի բնակիչ՝ 30-ամյա Դավիթ Բադալյանն է: Նա ամուսնացած չէր, բավական հանգիստ և հանդարտ անձնավորություն է եղել:
Սպանության հետ կապված մի քանի վարկածներ են շրջանառվում: Մեզ պատմեցին, որ ամենայն հավանականությամբ վիճաբանությունը եղել է «աղջկա թեմայով»: Լեզվակռիվ է սկսվել, որն արդեն վերաճել է վիճաբանության, քաշքշուկի և վերջում՝ դանակահարության:
Մեզ պատմեցին նաև, որ դանակահարությունը չի եղել նշված պուրակում: Վիճաբանությունը և դանակահարությունը այլ տեղում է եղել: Երիտասարդը դանակահարված վիճակում եկել է պուրակ, որպեսզի ջուր խմի, լվացվի, սակայն դանակի հարվածից սկսված ներքին արյունահոսության պատճառով պուրակում մահացել է:
Քննչական կոմիտեից փոխանցեցին, որ նախնական քննությամբ տվյալներ են ձեռք բերվել ենթադրյալ հանցագործություն կատարած անձի ինքնության վերաբերյալ, որոնք ստուգելու ուղղությամբ կատարվում են անհրաժեշտ քննչական գործողություններ, հանձնարարություններ են տրվել ոստիկանության ստորաբաժանումներին։
