«Առաջին լրատվական»-ի զրուցակիցն է նախկին պատգամավոր, ՀՀԿ-ական գործարար Աշոտ Աղաբաբյանը (Բուռնաշ):
–Պարոն Աղաբաբյան, վեցերորդ գումարման Ազգային ժողովը սկսեց իր աշխատանքները: Առաջին նիստը կայացավ, ընտրվեց ԱԺ նախագահը, փոխնախագահները: Հետևո՞ւմ էիք այս գործընթացներին և ինչ տպավորություն ստացաք:
-Ճիշտն ասած չեմ հետևել ամբողջ նիստին, բայց գիտեմ, որ Արա Բաբլոյանը նշանակվեց ԱԺ նախագահ, որին շնորհավորում եմ: Ծանր աշխատանք է լինելու, ծանրաբեռնվածությունը շատ է լինելու: Իհարկե նաև ցավակցում եմ Բաբլոյանին, քանի որ իր համար արդեն օր ու գիշերը վերջացավ: Բեղմնավոր աշխատանք եմ ցանկանում բոլորին: Շատ կուզենայի, որ այն բոլոր օրենքները, որոնք այսօրվա ժամանակի հետ համահունչ չեն, փոփոխվեն, որպեսզի ավելի շատ շահութահարկով բյուջեն լցվի, քան ավելացված արժեքի հարկով: Այսինքն՝ մարդիկ աշխատանք ունենան, աշխատեն, գումար վաստակեն: Նոր Ազգային ժողովը պետք է դրա համար բոլոր նախադրյալները ստեղծի:
–Պարոն Աղաբաբյան, խորհրդարանական ընտրություններից առաջ ՀՀԿ-ն անընդհատ խոսում էր սերնդափոխության մասին, բայց Արա Բաբլոյանի նշանակումով, ՀՀԿ-ն, ըստ էության, հակասեց իրեն: Ձեր կարծիքով՝ ինչո՞ւ կանգ առան հենց Բաբլոյանի թեկնածության վրա: Ինչո՞ւ հենց ամենատարեցը ընտրվեց ԱԺ նախագահ:
-Ճիշտ ընտրություն էր: ԱԺ նախագահը բնավ պետք չի, որ երիտասարդ լինի: Եթե շատ ջահել լիներ, էմոցիոնալ լիներ, փորձ չունենար, ճիշտ չէր լինի: Իսկ Բաբլոյանը տարեց մարդ է և մեծ փորձ ունի:
–Բայց Բաբլոյանի փորձն ու հմտությունները մանկաբուժության ոլորտում են՝ ոչ թե խորհրդարանական կառավարման:
-Դրա համար կուսակցությունում ստեղծվել է պատկառելի տարիք ու փորձ ունեցողների խումբ, որը ղեկավարում է Գալուստ Սահակյանը: Նրանք իրենց փորձով օգտակար կլինեն: Եվ հետո, Բաբլոյանը, մանկաբույժ լինելով, նաև սահմանադրական, օրենսդրական դաշտում բավականին լուրջ մարդ է: Փորձ ունի, և նրա գլխավորությամբ արդյունավետ աշխատանք կլինի: Նորից եմ կրկնում, եթե նա գնա այն օրենքների փոփոխությանը, որոնք կազուսներ են առաջացնում, և գնա ազգային օրենքներ ստեղծելու ճանապարհով, ապա հրաշալի կլինի: Պետք է այնպիսի օրենքներ ստեղծել, որը կհեշտացնի, կթեթևացնի տնտեսվարողների, արդյունաբերողների բեռը:
–Ամեն դեպքում, Ձեր կարծիքով ինչո՞ւ ԱԺ նախագահ ընտրվեց Բաբլոյանը: Տևական ժամանակ մամուլը գրեթե հաստատված գրում էր, որ այդ պաշտոնի հիմնական հավակնորդը Կարեն Կարապետյանն է (Տաշիր), բայց նա վերջին օրով հայտարարեց, որ իրեն չի տեսնում ԱԺ նախագահի պաշտոնում: Բաբլոյանի դեպքում ասվում է, որ նա կոմպրոմիսային տարբերակ էր բոլոր կողմերի համար: Կիսո՞ւմ եք այդ կարծիքը:
-Ամեն խոհանոց իր բաղադրատոմսերն ունի: Կուսակցությունում էլ քննարկումներ են գնացել և այդ տարբերակի վրա են կանգ առել: Ես չեմ կարծում, որ դա ինչ որ մեկին խանդի կամ նախանձի առիթ կտա:
–ԱԺ կառուցվածքը ինչպե՞ս կգնահատեք: Առաջին անգամ ԱԺ-ում է «Ելք» դաշինքը: «Ծառուկյան» դաշինքը իրեն ընդդիմադիր է հռչակել: Ձեզ համար ընկալելի՞ է այդ դաշինքի ընդդիմադիր կեցվածքը:
–Մենք բոլորս էլ գիտենք՝ «Ծառուկյան» դաշինքն իրենից ինչ է ներկայացնում, «Ելք» դաշինքը՝ ինչ: Գաղտնիք չկա այստեղ: Ժողովուրդն էլ լավ գիտի ամեն ինչ: Ոչ մի գաղտնի բան, շախմատային քայլ չի արվել:
–Նկատի ունեք՝ համագործակցությո՞ւն կա իշխանությունների հետ:
-Չի կարող չլինի: Ես բազմիցս ասել եմ, որ մենք կենտրանաձիգ իշխանություն ունենք, որովհետև մենք շրջափակման մեջ ենք, պատերազմի մեջ ենք, ամեն վայրկյան մեր հարևանը կարող է խախտել խաղի կանոնները: Մենք կենտրոնաձիգ իշխանություն պետք է ունենանք, որ կարողանանք դիմակայել տնտեսական, ռազմական և այլ մարտահրավերների, ոչ թե դնենք ու քննարկենք, թե որքանով է ընդդիմադիր «Ծառուկյան» դաշինքը, կամ «Ելք»‑ը: Ընդդիմության գործոնը նա է, որ ճշմարտությունը միշտ ասի: Խոսի այն ճշմարտության մասին, որը ժողովուրդը չի տեսնում և չի հասկանում: Բայց եթե ԱԺ-ում պետք է խոսեն նրա մասին, ինչ գիտի ժողովուրդը՝ անիմաստ է: Ընդդիմությունը դա անձի ընդդիմություն չի, ընդդիմությունը գաղափարական է: Ինձ համար անընդունելի է իրար գզմզելը, անձնապես վիրավորելը: Սրանով չի սահմանափակվում ընդդիմության գործառույթը:
–Իսկ ԱԺ նախագահի, փոխնախագահների և վերջին օրերի նշանակումներից Ձեզ համար ուրվագծվո՞ւմ է, թե որտեղ կլինի Սերժ Սարգսյանը 2018 թվականից հետո:
-Դա շատ կարևոր հարց է: Դա պրագնոզի խնդիր է, բայց ես մի բան գիտեմ, որ մեր կուսակցությունում հաջորդաբար, մեկը մյուսին փոխարինելով առաջ է գնում, գիտի իր արժեքը: Մեր կուսակցությունը և կուսակցության ղեկավարը պետք է լինեն Հայաստանում ընթացող իրադարձությունների մեջ: Ամեն բան առաջիկայում պարզ կդառնա: Բայց ամեն ինչից զատ մեր կուսակցությունը ունի հազարամյակի իր ծրագիրը և փորձելու է այն իրագործել: Չեմ բացառում, որ ոմանք կակտիվանան, գուցե ժողովուրդը անցնի նրանց կողմը, մենք կզիջենք նրանց առանց խանդի, քանի որ ՀՀԿ-ն մտածում է, որ կարևորը ժողովրդի կամքի ազատ արտահայտումն է: Ես չեմ ասում, որ մենք տնտեսության մեջ հաջողություններ ենք ունեցել, բայց տեղում չենք ունեցել: Ա-ից Բ կետ պետք է գնայինք մեկ ժամում, գնացել ենք 40 րոպեում, բայց ոչինչ: Նոր պառլամենտը պետք է անի ամեն ինչ, որ ժամանակի մեջ շահենք:
-Դուք շարունակելո՞ւ եք կուսակցական աշխատանքով զբաղվել:
-Եթե հանձնարարություն լինի՝ մեծ սիրով: Բայց ես նպատակ եմ դրել շատ աշխատատեղեր ստեղծել, օրենքը չխախտել, որ իմ աշխատողները իրենց քրտինքով ապրեն: