Չնայած ղարաբաղյան հակամարտության զորքերի շփման գծում լարվածության աճին և բանակցային գործընթացի սահմանափակ առաջընթացին, ԵԱՀԿ-ն շարունակում է ջանքեր գործադրել հակամարտությանը խաղաղ և տևական լուծման համար: Այս մասին նշվում է ԵԱՀԿ գործունեության 2016թ. զեկույցում, որտեղ ամփոփվել են կազմակերպության գործունեության և իրականացրած ծրագրերի արդյունքները:
Զեկույցի համաձայն՝ 2016 թվականին ԵԱՀԿ տարածաշրջանում առկա հակամարտությունները եղել են կազմակերպության օրակարգի առաջնահերթությունները, իսկ ղարաբաղյան հակամարտության գոտում բռնության հաճախակի դարձած դեպքերը անխուսափելի են դարձրել ճգնաժամի կառավարումը:
«Գերմանիան անհապաղ արձագանքել է 2016թ. ապրիլին ղարաբաղյան հակամարտության գոտում լարվածության էսկալացիային, նախաձեռնել է Մշտական խորհրդի նիստի անցկացում, կոչ է արել կյանքի կոչել Վիեննայի և Սանկտ Պետերբուրգի համաձայնագրերը, ընդլայնել ԵԱՀԿ գործող նախագահի անձնական ներկայացուցչի գրասենյակը և ստեղծել պատահարների հետաքննության մեխանիզմ: Գերմանիան կոչ է արել վերսկսել հակամարտության խաղաղ կարգավորմանն ուղղված բանակցային գործընթցը»,-ասվում է զեկույցում:
ԵԱՀԿ գործող նախագահի անձնական ներկայացուցիչ Անջեյ Կասպշիկը զեկույցում նշել է, որ ապրիլյան մարտերից հետո անձնական ներկայացուցչի գրասենյակը այցելել է տարածաշրջան՝ հանդիպելով հակամարտող կողմերի բարձրաստիճան պաշտոնյաների, զինվորականների հետ: Անձնական ներկայացուցիչը և նրա թիմը կողմերի աջակցությամբ ընդհանուր առմամբ իրականացրել են 22 մոնիթորինգային առաքելություն որոնցից հինգը՝ հայ-ադրբեջանական սահմանին, 17-ը՝ շփման գծում: