«Առաջին լրատվական»- ի զրուցակիցն է սփյուռքահայ գործարար Էդմոնդ Խուդոյանը:
-Մի քանի ամիս է Հայաստանում կառավարություն է փոխվել, վարչապետ Կարեն Կարապետյանը հայտարարեց, որ ներդրումների համար անհրաժեշտ դաշտ պետք է ապահովել: ԵՊՀ-ում ուսանողների հետ հանդիպմանը նա նշեց, որ ՀՀ կառավարությունը փորձում է ցույց տալ, որ ներդրումներ անելը և շահույթ ապահովելը հնարավոր է: Դուք այս ամիսներին, հետևելով Հայաստանում տեղի ունեցող այս փոփոխություններին, տեսնո՞ւմ եք արդյոք տնտեսությունը փրկելու հույս: Օրինակ՝ ներդրում անելու ցանկություն առաջացե՞լ է, թե՞ ոչ, և որքանո՞վ են իրատեսական այս խոստումները:
-Առաջին հերթին հետևում եմ հայաստանյան մամուլին՝ հասկանալու, թե հայրենիքում ինչ է կատարվում, դա ինձ հետաքրքրել է նաև մինչև իմ ներդրումներ կատարելը: Կարեն Կարապետյանի վարչապետ նշանակվելը մեծ ուրախություն առաջացրեց և՛ այստեղ, և՛ սփյուռքում, կարծում եմ՝ հնարավորություն կա փոփոխություններ մտցնելու և որոշ առումով կհաջողվի:
-Նա նշում է, որ 470 ծրագրից 340-ը իրատեսական է, դուք որևէ ձևով կփորձե՞ք ներդրում կատարել: Ընդհանրապես փոփոխություն տեսնո՞ւմ եք, բացի այն, որ Կ. Կարապետյանի անձը Ձեզ ոգեշնչել է:
-Ես ներդրում չէի անի, և, ցավոք, պիտի ասեմ, որ Սփյուռքից մարդիկ, որոնք տեղյակ են Հայաստանի արդարադատության կամ իրավական համակարգից, կոռուպցիոն հանգամանքներից ելնելով՝ դեռևս ներդրումներ չեն կատարի: Ուրախ եմ, որ կան ծրագրեր, գուցե հնարավոր է, որ դրանց մեծ մասը հնարավոր է իրագործել, չեմ բացառում, որ որոշ գործարար ներդրողներ կարող են հաջողության հասնել, բայց դրանով չի կարելի բավարարվել: Կարծում եմ՝ առաջին հերթին պետք է այսօր նայել կոռուպցիոն հանգամանքներին, մարդկանց, որոնք դեռևս խնդիրներ ունեն. իմ գործը փայլուն օրինակ է. 2011-ին մենք հրապարակային ներկայացրել ենք կոնկրետ կատարված հանցագործությունների մասին, դատախազությունը կամ իրավական համակարգը չի միջամտել, և չի փորձել խոչընդոտել կոռուպցիոն հանգամանքը, մեր ընկերության սեփականության յուրացումները: Եվ մենք այսօր դատական գործերի առջև ենք կանգնել, որոնք, Աստված գիտի, թե երբ կավարտվեն:
Հարցազրույցն ամբողջությամբ՝ տեսանյութում: