«Ամեն ստից բանի համար Վովա Գասպարյանը հո ձեզ չի ընդունելու»,- ոստիկանության աշխատակազմի ղեկավար Մերուժան Հակոբյանի խոսքերը փոխանցեց խաղաղ պայմաններում զոհված զինծառայողներից մեկի մայրը՝ Իրինա Ղազարյանը, «Առաջին լրատվական»-ի հետ զրույցում անդրադառնալով այսօր իրենց և ոստիկանների միջև տեղի ունեցած միջադեպին։
Նշենք, որ այսօր կառավարության ետնամուտքի մոտ պաշտպանության նախարար Վիգեն Սարգսյանին սպասելիս սևազգեստ մայրերին են մոտեցել ոստիկանները և փորձել են ուժով հեռացնել այնտեղից։ Այնուհետև ոստիկաններից մեկը թքել է սպանված զինծառայող Վալերի Մուրադյանի մոր՝ Նանա Մուրադյանի վրա։
«Իսկ երբ այդ պահին ես մոտեցա Նանային, որ օգնեմ նրան, որովհետև նրա ինքնազգացողությունը վատացել էր, մյուս ոստիկանը սկսեց թքելով խոսել ինձ հետ, թե՝ գնացեք էստեղից, գնացեք, ու իմ վրա էլ թքեց։ Հերիք չի էդ թքելը, հերիք չի մեզ հրելը, մի հատ էլ ցինիկ ձևով ասում է էդ ոստիկանը մյուսին, թե՝ ոստիկանության մեքենան բերեք, ես սրանց պիտի տանեմ բաժին, բաժնում կտենաս, թե ինչ կլինի հալդ։
Էս ձմեռով, էս ցրտին մենք եկել ենք, որ երեխաների սպանությունը բացահայտելու համար խոսենք նախարարի հետ, մեզ հետ նման ձևով են վարվում»,- վրդովված նշեց տիկին Ղազարյանը։
Նրանք այդ ոստիկանին պատասխանատվության ենթարկելու պահանջով կառավարությունից գնացել են դեպի ոստիկանություն, իսկ այնտեղ էլ նման պատասխան են ստացել։
«Վովա Գասպարյանն ասում է, թե տականքին պետք է հանել համազգեստից, հիմա էդ ոստիկանները, որ թույլ են տվել իրենց թքել մեզ վրա, ինչ ա՝ դրանք տականք չե՞ն, թող ոստիկանապետը ընդուներ, պատասխաներ մեր հարցին։ Դա մեր կարգավիճակում գտնվող մարդու համար ստից բան չի, մենք էլ Մերուժան Հակոբյանին ասեցինք, որ դուք դա ստից բա՞ն եք համարում, որ ոստիկանը թքում է զոհված զինվորի մոր վրա, նա էլ պատասխանեց, թե գնացեք դիմում-բողոք ներկայացրեք կատարվածի վերաբերյալ, մենք էլ ծառայողական քննություն կսկսենք»,- պատմեց Իրինա Ղազարյանը։
Վերջինիս տեղեկացմամբ՝ իրենք, սակայն, հրաժարվել են բողոք ներկայացնել՝ ասելով, որ կառավարության ետնամուտքի մոտ տեղադրված տեսախցիկներն այդ ամբողջը ֆիքսել են, տեսագրությունը կա։
«Հետո մեզ այդտեղ տեսավ Հունան Պողոսյանը՝ ոստիկանապետի առաջին տեղակալը, և ասեց՝ մենք տեղյակ ենք կատարվածին, ասել ենք, որ տեսախցիկները բերեն նայենք ու գործին ընթացք կտանք։ Թող գնան տեսախցիկներից նայեն, թե ինչ է կատարվել, ինչպես են ոստիկանները մեզ հետ վարվել, թե՞ ստից բողոք են գրել տալիս, որ մի կողմ շպրտեն էդ դիմումը ու ոչ մի բան չանեն»,- նշեց սևազգեստ մայրը։
