ԱՄՆ Պետդեպարտամենտի ներկայացուցիչ Ջոն Քիրբին հերթական ճեպազրույցն է անցկացրել ԶԼՄ-ների ներկայացուցիչների հետ, որի ժամանակ նրան հարց են ուղղել բլոգեր Ալեքսանդր Լապշինի վերաբերյալ, որը Ադրբեջանի պահանջով ձերբակալվել է Մինսկում Լեռնային Ղարաբաղ այցելելու համար։
«Երբ խոսքն արտահանձնման դիմումների մասին է, ավելի լավ է այդ մասին խոսեն համապատասխան երկրները։ Այդ մասին իսկապես պետք է այդ երկրները խոսեն։ Ակնհայտ է, որ մամուլի ազատությունը կարևոր է մեզ համար»,-ասել է պետդեպի ներկայացուցիչը՝ պատասխանելով հարցին, թե ինչպես է վերաբերվում բլոգերին Ադրբեջան արտահանձնելուն։
Պետդեպի ներկայացուցիչը նաև նշել է, որ որևէ կարևոր տեղեկատվություն չունի այս հարցի վերաբերյալ։
Պատասխանելով լրագրողների ազատ տեղաշարժի մասին հարցին՝ նա ասել է. «Մենք միշտ մտահոգված ենք մամուլի ազատության հարցով: Դա մի բան է, որի մասին մենք դժբախտաբար խոսում ենք ամեն օր: Իհարկե, լրագրողական գործունեության ազատության վերաբերյալ մեր մտահոգությունը շատ կայուն է, բայց ես չունեմ որևէ կոնկրետ տեղեկություն այս դեպքի մասին… Եվ սա մի թեմա չէ իրականում, որ այդ մասին խոսի Պետքարտուղարությունը»: