Փետրվարին տեղի կունենան ՀՀ փաստաբանների պալատի խորհրդի նախագահի ընտրություններ: Մամուլում շրջանառվում են փաստաբանների պալատում առկա խնդիրների մասին տեղեկություններ: «Առաջին լրատվական»– ի հետ զրույցում, անդրադառնալով հարցին, թե որն է փաստաբանների պալատում առկա խնդիրների թնջուկը, որ երկար ժամանակ չի լուծվում, փաստաբան Գևորգ Գյոզալյանը նշեց, որ առկա խնդիրները լուծելի են. «Կարծում եմ՝ բազմաթիվ խնդիրներ կարող են լուծվել խորհրդի ընտրություններով»:
«Շատ լուրջ խնդիրներ չկան փաստաբանական համայնքում, այդուհանդերձ, որոշակի ճգնաժամ կար պալատում: Մի քանի անգամ մամուլով բարձրաձայնել ենք մի շարք հարցեր: Որպես թարմ օրինակ՝ նշեմ օրենքի փոփոխությունների հարցը. մի քանի փաստաբաններով մտահոգիչ ենք համարում մի շարք դրույթներ, դիմել ենք կառավարությանը, որպեսզի դրանք վերանայվեն: Կառավարության բաց քաղաքականությունը, որի մասին նրանք հայտարարել էին, ի չիք դարձավ: Կառավարության կողմից մեր որևէ առաջարկ չի ընդունվել, միայն ի գիտություն է ընդունվել»,- նշեց փաստաբանը:
Անդրադառնալով դիտարկմանը, որ խոսվում է նաև փաստաբանական խորհրդի անդամների և նախագահի միջև առկա հակասությունների մասին, Գ. Գյոզալյանը նշեց, որ անհրաժեշտություն կա տարանջատելու փաստաբանների խորհուրդը պալատի այլ մարմիններից, մասնավորապես պալատի նախագահից, այսինքն՝ նախագահն ու խորհուրդը պետք է իրար հավասարակշռեն. «Այստեղ զսպումների մեխանիզմ պետք է աշխատի, չպետք է կախվածության մեջ գտնվեն մեկը մյուսից: Սա լուրջ խնդիր է, որն օրենսդրական դաշտում պետք է լուծվի, ինչը, սակայն, կառավարությունը չարեց»:
Մանրամասները՝ տեսանյութում:
