Արարատի և Վայոց Ձորի մարզերի ընդհանուր իրավասության դատարանում Հարություն Պետրոսյանի նախագահությամբ ընթանում է անչափահաս ամբաստանյալ Նարեկ Խ.-ի գործի դատական քննությունը:
Անչափահաս Նարեկը մեղադրվում է ամենածանր հանցագործության՝ ավազակությամբ զուգորդված՝ շահադիտական դրդումներով երկու անձի սպանության, ինչպես նաև սուտ մատնություն կատարելու համար՝ ՀՀ քրեական օրենսգրքի 104 հոդվածի 2-րդ մասի 1-ին, 8-րդ կետերով և 333 հոդվածի 2-րդ մասի 1-ին կետով:
Ըստ մեղադրանքի՝ 2015 թվականի հոկտեմբերի 20-ին, ժամը 10-ն անց 30-ից մինչև 13-ն ընկած ժամանակահատվածում գյուղատնտեսական աշխատանքներ կատարելու պատրվակով, բայց իրականում ուրիշի գույք հափշտակելու դիտավորությամբ Նարեկը գնացել է Եղեգնաձոր քաղաքի Իսակովի փողոցում գտնվող տանը միայնակ բնակվող, 91-ամյա Վարդուշ Ս.-ի տուն:
Նարեկը Վարդուշ տատիկին ասել է, թե որոշակի վճարի դիմաց այգեգործական աշխատանքներ կկատարի նրա համար:
Տատիկը համաձայնել է ու Նարեկին հրավիրել է ներս, տարել է խոհանոց:
Նարեկը, որ անմիջապես աչքադրել էր տատիկի ոսկե ականջօղերը, դրանք ավազակությամբ հափշտակելու դիտավորությամբ բռնել և ուժեղ քաշել է տատիկի ուսից, տատիկին գցել է գետնին, նրա գլուխը հարվածել է բետոնե հատակին…
Տատիկը գլխի երեք մասում ստացել է կյանքի հետ անհամատեղելի գանգուղեղային բաց, բութ վնասվածքներ և մահացել է:
Նարեկ Խ.-ն սպանված տատիկի ականջներից սառնասրտորեն հանել է կարմիր քարով ոսկե ականջօղերը ու հեռացել է: Հետագայում նա ականջօղերը 32 հազար դրամով վաճառել է ոսկե իրերի առուվաճառքով զբաղվող Հ. Ս.-ին:
Ըստ մեղադրանքի՝ 91-ամյա տատիկի սպանությունից 4 օր անց՝ հոկտեմբերի 24 –ին, ժամը 14-ից մինչև 18-ն անց 30-ի սահմաններում անչափահաս Նարեկ Խ.-ն գնացել է Վայոց Ձորի մարզի Վերնաշեն գյուղ:
Նա մտել է 76-ամյա Գոհար Բ.-ի հողամաս և առաջարկել է, որ այգեգործական աշխատանքներ կարող է կատարել որոշակի վճարի դիմաց:
Գոհար Բ.-ն համաձայնել է, նա անչափահասին առաջարկել է բարձրանալ խնձորենին ու քաղել խնձորները:
Նարեկը բարձրացել է ծառը, վերևից նայել ու տանտիրուհու ականջներին տեսել է համեստ ոսկե ականջօղերը՝ կարմիր քարով:
Նարեկն իջել է ծառից, վերցրել է խնձորենուն հենած բահը, այն գործադրել է որպես զենք՝ բահի մետաղե հատվածով թիկունքից ուժգին հարվածել է Գոհար Բ.-ի գլխի աջ գագաթ-քունքածոծրակային շրջանին՝ պատճառելով գանգուղեղային բաց բութ վնասվածք, որը հանգեցրել է գլխուղեղի կենսական կարևոր ֆունկցիաների սուր խանգարման:
Գոհար Բ.-ն մահացել է:
Նարեկը բերանքսիվայր ընկած տատիկի ականջներից հանել է ոսկե ականջօղերը ու հեռացել է:
Հետագայում նա ականջօղերը 28 հազար դրամով վաճառել է ոսկե իրերի առուվաճառքով զբաղվող Ս. Վ.-ին:
Ըստ մեղադրանքի՝ նախաքննության ընթացքում, զգուշացված լինելով սուտ մատնության համար նախատեսված քրեական պատասխանատվության մասին, Նարեկ Խ.-ն իր ցուցմունքներում վերը ներկայացված երկու սպանությունների հետ կապ չունեցող Սմբատ Զ.-ին անհիմն մեղադրել է այդ սպանությունների կատարման մեջ:
Անչափահաս ամբաստանյալ Նարեկ Խ.-ի խափանման միջոցը կալանավորումն է:
