Լրագրողների հետ զրույցում ԵՊՀ իրավաբանական ֆակուլտետի դեկան Գագիկ Ղազինյանը, անդրադառնալով «Կուսակցությունների մասին» օրենքի փոփոխություններին, նշեց, որ Սահմանադրական բարեփոխումների արդյունքում փոփոխված կառավարման համակարգը ենթադրում է, պարտադրում է կայացած քաղաքական դաշտի առկայություն. «Դա էլ իր հերթին ենթադրում է կայացած գաղափարախոսական հենքի վրա կայացած կուսակցությունների առկայություն։ Խորհրդարանական կառավարումը ենթադրում է գաղափարական պայքար կուսակցությունների մեջ, որի արդյունքում ընտրողը, տեսականորեն, պետք է կողմնորոշվի, թե որ կուսակցությանը, որ գաղափարախոսությանն է տալիս առավելություն և ցանկանում, որ այդ կուսակցությունը կառավարի երկիրը, կազմի կառավարություն»:
Գագիկ Ղազինյանը նշեց, որ միշտ եղել է այն կարծիքին, որ մեր երկիրը դեռևս հասունացած չէր խորհրդարանական կառավարման համակարգի անցնելու համար:
«Բայց այն, որ այդ համակարգը առաջադիմական է, որևէ մեկը չի կարող վիճել: Այս համակարգի կայացման համար երկու ճանապարհ կա. առաջինը՝ լավ կլիներ, որ արդեն կայացած կուսակցությունների պարագայում մենք գնայինք այդ կառավարման համակարգին: Քանի որ ունենք այն, ինչ ունենք, այս պայմաններում մնում է 2-րդ ճանապարհը՝ ստեղծել իրավիճակ, պայմաններ, կանոնակարգումներ, որոնք կնպաստեն այդ կուսակցությունների կայացմանը, և դրանով իսկ, հիմք կհանդիսանան կառավարման այս մոդելի աշխատանքի, կիրառության համար:
Կարծես դրան են ուղղված «Կուսակցությունների մասին» օրենքի փոփոխությունները, որոնցով փորձ է արվում այդ կուսակցությունները կայացնել, դրանով իսկ քաղաքական դաշտը կանոնակարգել: Հակառակ դեպքում մենք որևէ լավ բան չենք կարող սպասել կառավարման նոր՝ խորհրդարանական համակարգից, կլինեն իմիտացիաներ»,- նշեց Գ. Ղազինյանը:
Մանրամասները՝ տեսանյութում: