Տեղի ունեցավ «Ազատամարտիկների դաշինք»-ի վարչության ընդլայնված նիստ, ընտրվեց նոր վարչություն, նոր խորհուրդ:
«Սխալ կլինի ուղղակիորեն ասել, որ «Ազատամարտիկների դաշինք»-ը պատրաստվում է առաջիկա ընտրություններին»,- «Առաջին լրատվական»-ի հետ զրույցում ասաց «Ազատամարտիկների դաշինք»-ի խորհրդի անդամ Սմբատ Հակոբյանը:
Նրա խոսքով՝ խորհրդարանում պետք է լինեն այն մարդիկ, ովքեր հայեցի են, ովքեր իրականում ժողովրդի տված քվեն ժողովրդի օգտին են օգտագործում, ոչ թե իրենց անձնական ամառանոցների:
Ս. Հակոբյանն ընդգծեց, որ ազատամարտիկներն անելիք ունեն համախմբման գործընթացում. «Մեր ռազմավարական դրույթներում հայտնել ենք, որ «Ազատամարտիկների դաշինք»- ը պատրաստ է կամրջի, միջնորդի դեր կատարելու քաղաքական հոսանքների, քաղաքական ուժերի, քաղաքական և ազգային գործիչների միջև՝ համախմբման համար: Հասկանում ենք, որ ՀՀԿ-ի դեմ կարելի է պայքարել միայն միասնական ճակատով»:
«Այսօր մենք փաստեցինք, որ Հայաստանում չկա քաղաքական այնպիսի ուժ, ում հետ պատրաստ ենք գործակցել: Եվ եթե չլինի՝ ինքներս կստեղծենք՝ «ծաղկաքաղ» անելով»,- նշեց ազատամարտիկը՝ հավելելով, որ շատ փայլուն գործիչներ կան, որոնք կարող են մեր երկրին հսկայական օգուտ բերել:
Մանրամասները՝ տեսանյութում:
