Կոռուպցիայի դեմ արդյունավետ պայքարի համար անհրաժեշտ է, որպեսզի մանրամասն ուսումնասիրության ենթարկվի քաղաքացիական հասարակության յուրաքանչյուր ահազանգ, ինչպես նաև հետաքննող լրագրողների յուրաքանչյուր հրապարակում: Այսպիսի տեսակետ արտահայտեց «Բաց հասարակություն. Հիմնադրամներ» կազմակերպության փոխտնօրեն Դավիթ Ամարյանը ՀՀ «Գնումների մասին» նոր օրենքի հանրային քննարկմանը:
Այն մշակվել է ԵԱՏՄ միասնական պահանջներին համապատասխանեցնելու նպատակով՝ նկատեց ՀՀ ֆինանսների նախարարության ներկայացուցիչ Սերգեյ Շահնազարյանը. «Հայաստանը ԵԱՏՄ միակ երկիրն է, որը հանդիսանում է գնումների համաձայնագրին անդամակցող երկիր և նաև առաջին երկիրն է, որը իր օրենքը «հարմոնիզացնում է» ԵԱՏՄ համաձայնագրի պահանջներին: Այսինքն՝ մենք, կարելի է ասել, նենց «ծիպավոյ», օրինակելի ֆորմատ ենք ունենալու օրենքի, որը հետո, կարծում եմ, մնացած երկրները կօգտագործեն»:
Նրա խոսքով՝ «Գնումների մասին» օրենքում փոփոխությունների շնորհիվ հնարավորություն կստեղծվի խուսափել պետական գնումների գործընթացին օֆշորային գոտիներում գործող ընկերությունների մասնակցությունից:
Նախագծի համաձայն՝ պետգնումների կանոնակարգը խախտած և սև ցուցակում հայտնված ընկերությունները այդ կարգավիճակում կմնան ոչ թե 6 ամսից մինչև 3 տարի, այլ 2 տարուց ոչ պակաս ժամկետով: Այս կետը փոփոխվել է՝ համաձայն Եվրասիական տնտեսական միության համաձայնագրի պահանջի:
«Թրանսփարենսի ինթերնեյշնլ» հակակոռուպցիոն կենտրոնի փորձագետ Արտակ Մանուկյանի կարծիքով՝ ֆինանսների նախարարության վերապատրաստման և ուսուցման ծրագրերի որակը շատ հեռու է պահանջներից: