Գերմանիայում բուժվող վիրավոր զինվոր Արման Լազգիյանի հայրը՝ Միքայել Լազգիյանը «Առաջին լրատվական»- ի հետ զրույցում նշեց, որ արդեն բուժման երկրորդ փուլ են անցնում: Նրա խոսքով՝ Արմանն արդեն կարողանում է խոսել և սնվել, այժմ հետազոտվում է ողնաշարը, նյարդային համակարգը, վնասված է ողնուղեղը, բայց թե ինչ աստիճանի վնասվածք է և որքանով կվերականգնվի, դա ժամանակը ցույց կտա:
«5-րդ օրը մաքրեցին թոքերը՝ շատ արագ, և արհեստական շնչառական խողովակը, որ դրված էր շնչափողին, հանեցին, որևէ վիրահատություն չարեցին, մենք կարծում էինք, որ պետք է շնչափողի պլաստիկ վիրահատություն արվի, բայց այդ հարցն արդեն մեխանիկորեն դուրս եկավ, դա առաջին լավ նորությունն էր, որ լսեցինք:
Լազգիյանի խոսքով՝ գերմանացի բժիշկները հիացած էին Երևանում կատարված վիրահատական միջամտությունից, որը, նրանց գնահատմամբ՝ բարձր որակով է արված:
Մ. Լազգիյանը հավաստիացրեց, որ մեր ժողովուրդը, իշխանական կառույցի ներկայացուցիչները, ԱԺ պատգամավորներ, առողջապահության և Պաշտպանության նախարարները, վարչապետը օգնություն են հատկացրել իրենց անձնական միջոցների հաշվին, բայց պետական մոտեցում, պետության կողմից որևէ աջակցություն չկա: «Ինչպես մեր ժողովուրդն այստեղ, այնպես էլ Գերմանիայի, հատկապես Համբուրգի հայերը անընդհատ մեր կողքին էին, նաև հոգևոր առաջնորդն է այցելել»:
Արման Լազգիյանի բուժման համար գումար է անհրաժեշտ: Հայրը տեղեկացնում է, որ արդեն 39 հազար եվրո վճարել են բուժման համար, վերականգնողական կլինիկայում ամսեկան միջինը մոտ 30 հազար եվրո կպահանջվի՝ այսինքն՝ առայժմ ևս 60 հազար եվրո կպահանջվի բուժման համար: Բացի դրանից՝ եթե որոշվի, որ ողնաշարի ցողունային բջիջների վիրահատական միջամտություն պետք է իրականացնել, կպահանջվի ևս 50-60 հազար եվրո:
Մանրամասները՝ տեսանյութում:
