Վերջին շաբաթվա ընթացքում ավելի քան 700 փախստական կարող էին զոհվել Լիբիայի ափերի մոտ երեք խորտակումների հետևանքով, կիրակի օրը հայտնել է ՄԱԿ-ի փախստականների գծով գերագույն հանձնակատար Ֆեդերիկո Ֆոսին:
Save the Children միջազգային կազմակերպությունը հայտնել է, որ շուրջ 400 ներգաղթյալ կարող էին զոհվել անցած հինգշաբթի Սիցիլյան նեղուցում Հյուսիսային Աֆրիկայից Եվրոպա հասնելու փորձի ժամանակ: Միգրացիայի միջազգային կազմակերպության տվյալներով` ևս 100 ներգաղթյալ կարող էին զոհվել շրջված նավակից: Իտալիայի ռազմածովային ուժերը ուրբաթ օրը հայտնաբերել են զոհերի 45 մարմին նմանատիպ խորտակումից:
«Իրավիճակը քաոսային է, մենք չենք կարող վստահ լինել թվերի հարցում, սակայն մենք վախենում ենք, որ ավելի քան 700 մարդ կարող էին այս շաբաթ խեղդվել երեք խորտակումների հետևանքով»,- մեջբերում է France Presse գործակալությունը Ֆեդերիկո Ֆոսիի խոսքերը: